TVB資深演員周驄今日（4日）傳出因肺炎病逝，享年92歲。周驄原名冼錦榮，1950年代入行，80年代初已經拍過超過100部電影。當時電影圈發展前景未明，令佢一度離開幕前，改行做戲院經理，但始終未能割捨演藝夢，最終經過一番波折，加入無綫電視（TVB），延續自己嘅演藝事業超過20年。

周驄入行前曾喺餐廳及百貨公司做嘢，1955年，有製片人黃慶華喺百貨公司睇中佢外形出眾，推薦佢做演員。藝名「周驄」來自名劇《雷雨》中嘅角色「周沖」，又因為周驄屬馬，就特別揀咗一個帶有「馬」部首嘅字。入行初期，周驄曾一度唔習慣幕前工作，甚至想放棄，但得到黃慶華嘅鼓勵同支持，有機會同前輩合作，逐漸重拾信心。

周驄早喺70年代尾已經首次加盟TVB，到1998年再度回巢，當時已踏入晚年嘅佢，大多扮演公公爺爺角色。其中最令人印象深刻嘅，係《溏心風暴之家好月圓》裏飾演李司棋嘅爸爸鍾泛達，仲因此入圍當年萬千星輝頒獎典禮「最佳男配角」嘅最後五強。另外，周驄亦參演多部家傳戶曉劇集，包括《美味情緣》、《團圓》、《純熟意外》同《當旺爸爸》等。佢喺電影《新紮師妹》中飾演吳彥祖爸爸，一句經典對白「個sir字點寫？」更成為網民集體回憶。

2020年3月，周驄約滿無綫，正式退休，最後一套電視劇係《逆天奇案》。雖然一直以綠葉角色為主，但周驄嘅角色深入民心，例如《溏心風暴之家好月圓》中嘅廿四孝爺爺鍾泛達、《當旺爸爸》中飾演馬浚偉嘅爸爸等。2016年，佢更獲TVB頒發「萬千光輝演藝大獎」，以表揚佢多年嚟嘅貢獻。

退休後，周驄仍有參與客串電影演出，包括2021年嘅《感動她77次》同《殺出個黃昏》。個人方面，周驄與太太育有3女1子，太太早年曾飽受坐骨神經痛困擾，膝蓋亦有小問題。周驄曾喺「賽馬會安寧頌」訪問中透露，太太曾患上癌症，為咗照顧病妻，佢亦曾減少幕前嘅演出。