政制及內地事務局日前提出設立一個「同性伴侶關係登記機制」，回應前年終審法院就岑子杰同性婚姻案嘅判決。不過，事主岑子杰就指政府今次嘅方案根本未符合終院裁決要求，質疑呢個制度只係畀海外結婚嘅同性伴侶登記，唔係終院所要求嘅婚姻替代框架，認為方案被人司法覆核挑戰嘅機會極高。政制局局長曾國衞就唔點名回應岑子杰，警告有關人士發言前必須「深思熟慮」，如果唔係，不但無幫助，甚至帶嚟負面影響。

岑子杰2023年就同性婚姻權益提出司法覆核，喺終審法院獲部分勝訴。終院判港府必須喺今年10月底之前設立同性伴侶嘅法律替代框架，以滿足基本社會需求。政制及內地事務局喺周三（2日）向立法會提交建議，提出建立「同性伴侶關係登記機制」，申請登記嘅同性伴侶除咗必須年滿18歲，同埋最少一方係香港居民之外，更要喺海外承認同性婚姻嘅地方註冊結婚，先至可以喺香港登記。成功登記嘅同性伴侶，可以享有參與伴侶醫療事務嘅基本權利，包括醫院探視、獲取醫療資訊、參與醫療決定、器官捐贈同處理伴侶身後事，如領取死亡證同遺體。

岑子杰喺周四（3日）接受電台訪問時表示，政府嘅建議根本唔係終院所指嘅婚姻替代框架，認為一定會被人法律挑戰，「呢個方案只係海外登記制度，仲要唔可以喺香港直接登記，一定要去外國註冊結婚先至得」。佢又指海外同性婚姻嘅費用相當昂貴，離婚手續亦複雜，批評政府嘅做法根本係架床疊屋，非常唔公平。此外，岑子杰亦指出，方案完全無提到同性伴侶探監權，明顯同終院判詞要求相差甚遠，促請政府必須諮詢同性戀組織，並安排立法會舉行公聽會。

立法會政制事務委員會周四召開特別會議討論方案，政制局局長曾國衞特別提到留意到岑子杰嘅評論，呼籲有關人士發言必須負責任，提醒對方說話前要深思熟慮，否則可能對同性伴侶社群帶嚟不良影響，「唔單止無用，甚至有害」。曾國衞表示，政府提出海外登記嘅要求係為咗減少核實申請人身份嘅麻煩，如果香港自行核實，可能要面談同提供證明文件，反而更麻煩。岑子杰就回應話，自己已經盡量小心謹慎：「我聽到佢嘅忠告，相信佢係善意嘅，我自問自己講嘢內容應該比何君堯議員溫和好多，我哋雖然立場唔同，但希望佢感受到我嘅善意。」

建制派幾乎全面反對今次嘅方案，多個政黨包括民建聯、經民聯、工聯會同自由黨紛紛表態反對，質疑政府等同承認同性婚姻，又指方案倉促推出，要求政府進行更廣泛嘅公眾諮詢。議員何君堯就批評終院嘅判決唔一定係啱，如果涉及國家安全，政府應該請人大釋法，又話今次終院判錯咗，佢唔會尊重呢個判決。經民聯議員梁美芬更加形容方案係「打開潘朵拉嘅盒子」，認為政府破壞傳統家庭價值同一夫一妻制，政府應該先向法院申請延期，而唔係急急推方案。

但議員謝偉俊就認為政府今次嘅方案係「相對保守」，只係承認喺外地註冊嘅同性伴侶關係，所提供嘅權利亦係最基本，「只可以講係法院逼到政府行一步時，政府行咗半步」，認為政府嘅做法保守而有限。佢又強調法治係香港嘅金漆招牌，政府同議員都必須尊重終審判決，唔可以輸打贏要，「即使我本人、立法會同政府都唔支持同性婚姻，但政府已經走出勇敢嘅一步，大家應該諗下點樣喺兩難局面尊重法治。」

謝偉俊仲警告，如果立法會一味反對，會引來更多人司法覆核，社會將會不斷折騰，問返香港人係咪真係想見到咁嘅情況：「今次好彩中央政府無特別介入，大家可以憑良心、本心去投票。」