《信報》報道，本港餐飲業經營環境依然嚴峻，老牌快餐連鎖店大快活公布截至今年3月底嘅全年業績，股東應佔溢利為3,554萬元，按年大跌29.8%。行政總裁李碧琦表示，希望業主可減租20%以上。

業績顯示，大快活每股盈利得27.43仙；派末期息每股17仙，較去年同期大減43.3%，連同中期息，全年合共派息22仙，跌幅達46.3%，派息比率亦由去年度105%降至80.2%。期內收入為31億元，微跌1.2%；毛利率亦由8.6%回落至7.7%。

截至報告期末，大快活旗下共有176間分店，淨減少6間，其中香港佔157間（淨減1間），內地則剩19間（淨減5間）。管理層坦言，希望業主能減租至少兩成，公司目前未有加價計劃。

就派息明顯減少，非執行主席羅開揚解釋，公司嘅派息比率向來維持喺七成左右，上年派得較多，今年回復至約80%水平，屬合適做法，主要係應對市場未來嘅挑戰，保留現金用作未來發展用途，更表示現時經營環境下仍有派息已算唔錯。期內公司借入銀行貸款540萬元，負債比率由原本零升至0.8%。執行董事兼副主席羅輝承解釋，今次借貸純粹係因為人民幣貸款利息較低「有着數」，實際金額唔多，未足以用作新投資，未來發展將繼續以自有資金為主。

行政總裁李碧琦表示，公司將把握目前租金下調嘅機會，積極擴展分店網絡，期望今年底分店數量可以淨增長。現時新租約可與業主有較大嘅議價空間，視乎地點同樓面面積，希望業主可減租20%以上。過去租金跌幅由個位數至雙位數不等。成本管理方面，公司將以自動化方式提升生產效率，並加強員工培訓，鼓勵員工身兼多職。食材方面則改用源頭直購，有效將食物成本降低3%，並預期毛利率將逐步提升。

李碧琦透露，今年4至5月生意微跌，但6月業績有所改善。鑑於目前市況具挑戰性，公司暫未有加價計劃，目前平均惠顧金額為42元，將繼續透過高性價比策略，例如加配產品吸引顧客，務求提升平均惠顧金額。

內地市場方面，李碧琦表示，公司仍會繼續擴張分店，但會以較審慎嘅態度進行，並著重維持較低嘅租售比。羅輝承補充，大灣區市場仍具潛力，長遠店舖規模會較現時大，但受限於短期挑戰，今明兩年將較為謹慎，目前初步目標係新增6至8間分店。

此外，大快活亦公布人事變動，羅開揚由4月1日起由執行董事調任為非執行董事，但繼續留任主席職位。他喺記者會開場時表示，兒子羅輝承喺擔任執行副主席後，現時正主理公司嘅發展及策略，而行政總裁李碧琦已加入公司14年，喺市場營運方面擁有豐富經驗，佢對兩人充滿信心，相信新一代管理層將會有更多新思維及更好嘅表現，帶領公司繼續向前。