中國海關總署尋晚（29日）突襲式宣布，即日起有條件恢復進口日本部分地區嘅水產品，但福島縣、東京都等10個都縣仍然維持進口禁令。據悉，去年9月18日「深圳日本人學校小學生遇害事件」發生之後，中國隨即同日本商討水產進口問題。

中國海關總署公告指出，日本企業喺完成中國方面嘅註冊手續後，即可恢復對中國出口水產品。不過，出口時必須附上日本官方出具嘅衛生證書、放射線物質檢驗合格證明同產區證明。而繼續禁止進口嘅10個都縣分別係福島縣、群馬縣、栃木縣、茨城縣、宮城縣、新潟縣、長野縣、埼玉縣、東京都同千葉縣。

中國於2023年8月，以福島第一核電廠核處理水排海為由，全面停止進口日本水產品。去年9月，中日雙方達成共識放寬禁令。日本方面表示，雙方喺今年5月底就恢復進口日本水產嘅必要條件達成共識。

中國官媒《環球時報》前總編輯胡錫進發文稱，「近兩年前的抵制和今天的恢復決非彼此矛盾的。在如此重大的安全問題上，我深信，中國人民的利益在哪裡，政府的行動就會指向哪裡。」佢認為，「我們作為中國老百姓在這個問題上跟著政府的態度走，這是最為明智，也最能保障我們大家集體利益的選擇。」

胡錫進稱，日本喺2023年8月啟動排放核污染水，當時中日關係一度尖銳衝突。而家事隔差唔多兩年，中國政府做出恢復日本部分地區水產品進口嘅決定。胡錫進指出，冇任何人掌握嘅信息會多過政府，而政府處理呢個問題時只會從中國人民嘅利益出發，絕對唔會從日本嘅利益出發。今年喺國際原子能機構組織下，中方專家赴日本福島採集咗多種唔同樣本，進行獨立取樣檢測，為恢復進口日本水產品唔會對中國人安全構成風險提供咗科學依據同保障。

胡錫進稱，有人可能擔心北京會受到東京嘅壓力，而不得不作出讓步。佢認為，「這種擔心不能不說是多餘的。中國政府在原則問題上硬懟美國都毫不含糊，怎麼可能會在中日之間拿中國人的安全做交易？它完全是不可思議的事情。」

中國過去曾經係日本水產品最大市場，據統計，日本2022年向中國出口價值871億日圓嘅水產品，包括珍珠同珊瑚。但呢個數字喺2023年下跌至610億日圓，而2024年上半年更進一步跌至僅僅35億日圓。日本農業、林業同漁業產品總體出口喺2024年上半年自2020年以來首次下滑，主要係因為對中國嘅出口暴跌43.8%所致。鮮貝出口受影響最嚴重，較去年同期下跌37%。

日本貿易振興機構（JETRO）理事長石黑憲彥當時表示，「我們還沒有完全彌補失去中國市場遭受的出口量的損失，但是對美國、加拿大、泰國和越南的出口正在增加，大大提振了替代市場的勢頭。」石黑憲彥又話，日圓匯率超低同日本旅遊觀光業興旺亦係日本水產嘅福音，而家喺中國以外地區，日本海鮮已經早已擺脫名譽風險。