台灣《中央社》引述中國官媒《人民日報》24日嘅文章報道，北京當局近日加強反腐力度，查出唔少年輕幹部違法亂紀嘅個案，直指部分年輕幹部違法亂紀嘅案件令人咋舌，雖然佢哋年紀唔大，職級亦唔高，但「胃口、膽子都不小，為害不淺」。

呢篇名為「年輕幹部是腐敗高危人群嗎？」嘅文章指出，近期有關年輕幹部違紀嘅討論引起公眾極大關注，「玩心重、混日子、說話隨意、口大氣粗、精神空虛、貪圖享樂、社會交往復雜、生活不檢點」，成為各地查擺年輕幹部問題嘅關鍵詞。

文章進一步表示，從上述嘅關鍵詞睇嚟，一啲年輕幹部嘅思想品質、工作作風同精神狀態「似乎出了問題，哪一條都很不簡單」，近一段時間，年輕幹部違法亂紀嘅典型案例確實令人咋舌。

文章舉出唔少實際案例，例如有人為咗玩網絡遊戲，不惜挪用數百萬人民幣嘅公款進行遊戲儲值；亦有人深陷網絡賭博、直播打賞同奢侈享受之中，不能自拔。儘管部分年輕幹部「年齡不大、職級不高，但胃口、膽子都不小，為害不淺、影響尤甚」。

文章仲提到，現時中國好多年輕人嘅消費觀念超前，興趣廣泛，用錢亦相當大手。而有啲工作崗位薪酬待遇並唔高，壓力同責任卻不少，令一啲年輕幹部產生職業落差，開始喺自己負責嘅環節「撈錢、擠油水」，將原本應該用喺工作上嘅技術實力同創新能力，用喺篡改網絡程式、盜取單位數據同侵入系統截取資金上，「能力越大、危害越大」。

文章又批評，一啲單位對年輕幹部「重使用、輕管理，只鼓勵、不教育」。例如有嘅單位任由年輕幹部濫用公章；有嘅隨意讓年輕幹部代筆審批文件；仲有以專業特長為理由，唔區分會計同出納嘅職務，種種做法客觀上為年輕幹部違紀違法提供咗便利條件。

文章更發出警告，年輕幹部「不是腐敗的天然免疫群體」。如果存在個人思想滑坡，加上環境嘅煽風點火以及制度嘅缺位同失位，再優秀嘅天之驕子，稍一不慎亦會淪為階下囚。

文章最後強調，腐敗與年齡並無強烈相關，亦非特定群體獨有嘅問題，真正需要注意嘅係「權力的制約、黨性的淬鍊和意志品質的健全」。現時中國對年輕幹部嘅警示教育，並唔係要污名化或者標籤化呢個群體，而係將「關卡前置」，將防範工作做到最前面，令年輕幹部及早了解「該不該做、能不能幹」，以免將來追悔莫及。