美國於伊朗當地時間22日凌晨轟炸3座重要核子設施。台灣《中央社》綜合紐約時報等外媒分析衛星影像評估伊朗受損程度，外部專家認為，伊朗核計畫雖已遭受重創，但還遠未達被摧毀程度，大量濃縮鈾仍存在而且下落不明。

美方高層官員表示，7架B-2轟炸機向位於伊朗嘅福爾多（Fordo）同納坦茲（Natanz）嘅地下核設施，投放咗大量重達3萬磅嘅「碉堡剋星」巨型鑽地炸彈，同時美軍潛艇亦發射近30枚巡航導彈，襲擊咗伊斯法罕（Isfahan）核子設施。

＊福爾多核設施仍未摧毀 但已無法繼續運作

福爾多核設施係伊朗其中最重要嘅核濃縮地點，為咗防止外國攻擊，專登建喺深山之內。美軍今次攻擊係專門針對福爾多嘅通風系統，根據Maxar Technologies提供嘅22日最新衛星圖片顯示，設施附近有新出現嘅大彈坑、疑似崩塌嘅隧道入口同山脊頂部明顯破損。不過，有一座控制地下鈾濃縮廳通風嘅支援建築就冇受損，國際原子能機構（IAEA）亦話，當地未見輻射外洩。美國一名高層坦承，就算用咗12枚巨型炸彈，亦無法完全摧毀呢座極度堅固嘅地下基地，但已經造成嚴重破壞，令福爾多「基本上已經用唔到」。

＊納坦茲設施遭精準攻擊 未確定是否完全穿透地下設施

納坦茲嘅鈾濃縮設施，係伊朗最大嘅核濃縮中心。早前已經多次遭到以色列空襲破壞，美軍今次空襲似乎係特別針對納坦茲嘅地下濃縮大廳正上方，衛星影像顯示地面上新增兩個大型彈坑，其中一個彈坑直徑更達到5.5米。不過，由於納坦茲嘅濃縮設施位於地下40米，並有8米厚嘅鋼筋混凝土保護，目前仍無法確定美軍嘅炸彈是否完全穿透。

＊伊斯法罕設施證實嚴重受損：

喺伊朗古都伊斯法罕嘅核設施，据信係儲存接近武器級嘅核燃料，衛星圖片清楚顯示該處嘅地面建築被大幅炸毀，國際原子能機構亦確認伊斯法罕設施「損毀嚴重」。

美軍參謀長聯席會議主席凱恩（Dan Caine）喺記者會表示，要評估最終戰損需要時間。同時，國際原子能機構嘅檢查人員超過一星期都未能確認伊朗儲存嘅高濃度鈾位置，伊朗官方亦承認已經移走咗國際原子能機構嘅封條，並將相關濃縮鈾搬走。

多位國際專家都警告，即使美軍嘅空襲成功重創伊朗核計劃，但仍遠未達致完全摧毀嘅程度。密德伯里國際研究學院教授路易斯（Jeffrey Lewis）指出，美軍嘅轟炸「仍然有啲重要嘢未打中，如果到此為止，真係未竟之功」。路易斯特別提到，伊朗嘅高濃縮鈾仍未被擊中，佢哋根本唔清楚呢啲濃縮鈾嘅去向。

「科學暨國際安全研究所」主席歐布萊特（David Albright）亦表同意，佢話：「我相信伊朗仍有大量濃縮鈾存在，核問題根本未算解決。」兩位專家更透過衛星影像發現，喺美軍空襲前幾日，就有多架貨車出現喺伊斯法罕同福爾多嘅入口，相信伊朗早就預期美國攻擊，將濃縮鈾轉移咗去其他地方。

國際原子能機構之前評估伊朗有超過400公斤嘅60%濃縮鈾，足夠製造約10枚核彈，而專家更擔心伊朗仲可能有未曝光嘅核設施。

歐布萊特指出，伊朗核計劃雖然嚴重倒退，但絕對唔可以輕視佢哋捲土重來嘅可能性，要徹底解決問題，唯一辦法就係透過國際監察同外交協議，否則伊朗嘅核威脅只會捲土重來。路易斯亦表示，就算美軍嘅空襲做到最好，恐怕亦只係拖延咗伊朗幾年核計劃，而未來仍然有好多未知嘅風險存在。