以色列同伊朗嘅戰爭越演越烈，以色列南部有醫院遭到伊朗導彈攻擊。以色列總理內塔尼亞胡暗示，衝突只會係伊朗最高領袖哈梅內伊被擊斃之後先會完結。同一時間伊朗總統專機就悄悄地抵達阿曼。

《耶路撒冷郵報》報導，伊朗彈道導彈星期四清晨擊中以色列南部城市比爾謝巴索羅卡醫院，響起警報聲之後上下陷入一片混亂。醫院發言人表示，導彈襲擊導致醫院多處嚴重受損，尤其係舊手術大樓影響最為嚴重，醫院服務已經受到明顯干擾，造成 4 人傷勢嚴重，至少 30 人輕傷。以色列總理內塔尼亞胡喺社交平台 X 發文稱，「伊朗恐怖分子暴君」向索羅卡醫院同以色列中部平民發射導彈，揚言「會讓德黑蘭暴君付出應有代價」。

美國廣播公司新聞網記者向內塔尼亞胡提問：「咁你哋係咪直接針對伊朗最高領袖？」內塔尼亞胡回應時話：「我哋會做所有需要做嘅事，至於細節，我暫時唔方便公開」

伊朗軍方嘅核心圈正快速瓦解，短短5日之內，已經成功擊斃兩任伊朗參謀總長。以色列軍方發言人德夫林表示：「我哋已經擊斃咗伊朗政權嘅最高軍事指揮官、參謀總長沙 德馬尼。」

與此同時，美國軍事網站《戰區》18號引述航班追蹤網站Flightradar24嘅消息，指出一架相信係伊朗總統專機，以及另外兩架政府所屬嘅飛機，已經確認降落喺阿曼首都馬斯喀特。

消息指出，呢三架飛機分別係兩架空中巴士A321同一架空中巴士A340，但係起飛地點仍然唔清楚，而伊朗官方到目前為止都未對呢啲航班嘅目的或乘客身份作出解釋。據悉，呢架空巴A340（註冊編號EP-IGA）之前多次用嚟接載伊朗總統裴澤斯基安，包括上年去美國參加聯合國大會，故此被推測係總統專機。

《戰區》網站分析，伊朗飛機抵達阿曼嘅原因有幾個可能性：第一，伊朗政府可能派出高層代表團，準備同以色列展開新一輪嘅停火談判；第二，係載送想要逃離德黑蘭同西部空襲前線嘅重要人士；第三，係為咗避免飛機喺空襲中被摧毀，預先調走，為日後撤離伊朗高層作準備。