《聯合早報》報導，有馬來西亞本地建築同裝修業界人士爆料，唔少中國承包商喺網上接單後，利用免簽政策，用旅遊名義安排中國工人入境，甚至帶埋成隊施工團隊，嚟搶馬來西亞本地嘅生意。

最近馬來西亞嘅社交媒體，特別係小紅書上，出現咗愈嚟愈多來自中國嘅承包商廣告，主打由室內設計、裝修，到傢俬安裝嘅「一條龍」服務。呢啲廣告以手工靚、效率高、價錢抵作賣點，成功吸引咗唔少馬來西亞消費者嘅注意。

馬來西亞「比覓裝修有限公司」嘅執行董事林師行話，免簽政策令中國人入境馬來西亞變得相當容易。部分中國承包商喺網上接單之後，會先喺中國完成室內設計、預製傢俬同櫥櫃等，然後再派工人入馬來西亞安裝，一般裝修都會分階段進行，包括木工、瓷磚、水電工程同傢俬安裝，呢啲中國工人會分批入境，喺免簽期間內輕鬆完成每個工序。

自2023年12月1日起，馬來西亞同中國開始互免簽證，兩國國民可以免簽入境，最初逗留期限係30日，今年4月更加延長至90日。不過，免簽證係專為旅遊或探親等非盈利活動而設，絕對唔准從事任何形式嘅工作或商業活動。唔少中國博主喺小紅書上大賣「中國工藝」，聲稱手勢快過本地師傅。被問起佢哋工人係咪有工作證時，淨係回應話「有證」，但又無提供相關證明。

中國工人湧入馬來西亞市場，靠低成本同高效率搶走大量生意，令本地業者叫苦連天。林師行直言，本地建築同裝修業一直靠印尼、孟加拉勞工，但中國工人手工同效率明顯高出好多，深受華人業主喜愛。「免簽政策實施以來，好多同行嘅生意明顯差咗。中國工人實行『996』工作制，整體成本只係本地嘅一半，我哋根本無得鬥。」

馬來西亞系統集成商歐建富最近喺雪隆區嘅工業區工作時發現，好多廠房嘅裝修都由中國人承接，尤其係中馬合資嘅工廠特別多。佢認為，呢個現象唔單止影響本地就業機會，仲帶嚟嚴重嘅建築安全隱患。歐建富指出，中國工人用嘅電器插頭往往唔符合馬來西亞標準，例如工業區嘅高壓電系統理論上必須由持牌電工負責，但中國團隊成日跳過呢個程序。

此外，呢種濫用簽證嘅情況已經擴散到零售、旅遊甚至攝影行業。唔少馬來西亞攝影師抱怨，中國攝影團隊以299令吉（約540港幣）超低價搶生意，甚至高薪挖角本地化妝師。

雪蘭莪居民黃錦偉表示，之前同太太諮詢攝影配套就因為價錢太吸引，廣告提供兩套服裝同造型，價錢仲唔到300令吉，加上本地網紅宣傳，令人心動。但馬來西亞攝影商總會提醒，呢啲外國團隊可能涉及非法工作，更可能附帶隱藏收費，最終開銷可能高達7000令吉（約12500港幣）。

馬來西亞中小企業公會總會長陳棋雄指出，業界歡迎馬中免簽政策，期望帶動更多商機，但前提係中國工人必須合法進入市場，同本地企業合作。但事實上，好多中國人利用免簽入境後非法打工，仲住喺工地或廉價酒店，令執法變得非常困難。

陳棋雄呼籲馬來西亞政府必須加強監管同執法力度，嚴懲違規行為，保障本地中小企業利益。佢建議移民局嚴格審查入境人士背景，要求提供住宿地點、行程安排同回程機票等資料，防止有人假借旅遊非法打工。佢仲提醒消費者，唔好貪小便宜聘請非法勞工，一旦出現質量或售後問題，不但難追究責任，仲可能招致重大損失。

截至目前，馬來西亞僅與印尼、孟加拉、印度及越南等15個國家簽署外勞協議，中國並唔包括在內。根據馬來西亞移民法，僱用非法外勞可判罰款1萬至5萬令吉（約18000至90000港幣），或監禁12個月以下，甚至兩者兼施。