黨媒《文匯報》13日刊登社評文章，指該報記者發現現居台灣嘅前香港中文大學助理教授沈旭暉，喺Instagram及Facebook等社交平台，以收藏香港歷史為名，進行「疑似危害國家安全」嘅活動，當中包括出售帶有「港獨」訊息嘅物品。指有關專頁展示2019年香港社會事件期間嘅「藝術品」及「歷史書籍」，將相關主張描述為民主及真理與自由，並呼籲公眾加入會員同捐款。

《文匯報》文章提到，沈旭暉喺2021年7月以約1,495萬港元出售位於大埔露輝路倚龍山莊29號嘅地下物業，賬面獲利562萬港元後，移居台灣生活，並於今年1月喺台灣開設名為「國際香港圖書典藏館」嘅網頁。文章稱該平台以收藏香港歷史為名，但實際展示2019年社會事件期間嘅宣傳品，並將之稱為「珍貴藏品」。

另外，《文匯報》文章引用資深大律師湯家驊嘅講法，指根據香港國安法第38條，任何人不論身處香港境內或境外，只要進行涉及分裂國家嘅行為，都可能觸犯國安法，並可能遭到香港警方嘅通緝。湯家驊表示，雖然單純瀏覽相關網頁內容並唔犯法，但若果市民轉發、分享、傳播有關信息，甚至網購相關產品，都可能觸犯法例。湯家驊警告，見到相關嘅信息時要特別小心，以免誤墮法網。湯家驊亦指出，香港特區政府有權要求社交平台刪除相關嘅違法內容，又警告「違法就是違法」，要清楚區分，避免下載同傳播可能涉及違法嘅內容。

《文匯報》文章亦引用民建聯立法會議員葛珮帆嘅講法，指唔少市民都有轉發或分享帖文嘅習慣，但若無意中轉發涉及『港獨』嘅內容，有可能觸犯香港國安法。葛珮帆表示，特區政府同社會各界應加強宣傳，提醒市民切勿轉發或分享相關內容，避免無意中觸犯法例。

葛珮帆又話，年輕一代對網上訊息嘅辨別能力有限，更容易受到誤導，因此教育方面嘅工作尤為重要」，呼籲家長、學校及政府都應加強對青少年嘅教育工作，教導學生如何識別網上違法訊息，避免受誤導而犯法。

葛珮帆又聲稱，現時網絡上充斥各種犯罪陷阱，除了包裝成民主自由嘅『煽獨』信息外，亦有針對年輕人嘅網絡詐騙陷阱。警告市民同家長，要留意自己同子女嘅上網習慣，教育子女識別網上嘅有害信息，並強調切勿下載及轉發呢啲信息，以免誤墮法網。

《文匯報》文章最後指出，遵守香港國安法同維護國家安全係所有市民嘅法律義務同品德責任，特區政府同各界都有義務加強國安教育，並呼籲市民嚴格遵守國安法，避免參與傳播涉及港獨嘅信息。