伊朗局勢再度急轉直下，以色列軍隊最新一輪的攻擊目標竟然係伊朗國營電視台IRIB（伊朗伊斯蘭共和國廣播電視台）。事發時，IRIB當家女主播正在鏡頭前激烈抨擊以色列，聲稱伊朗已經開始反攻，並信誓旦旦表示勝利近在眼前，點知話音未落，電視台攝影棚突然傳來一聲巨響，爆炸令棚頂碎石磚頭紛紛跌落，一秒前仲咄咄逼人的主播即刻驚慌失措，急急腳轉身逃離現場。直播畫面迅速中斷，改播預錄節目，混亂場面瞬間令觀眾目瞪口呆。

根據英國廣播公司（BBC）同伊朗當地媒體嘅報導，事件發生係喺首都德黑蘭嘅IRIB總部辦公大樓，以色列軍隊發射至少4枚炮彈精確擊中目標，引發嚴重火災，現場濃煙滾滾，有多名員工喺襲擊中死傷。

以色列國防部長卡茲（Israel Katz）喺襲擊後隨即發表聲明，明確指出伊朗嘅國營電視同廣播即將「從此消失」，並話伊朗嘅「宣傳機器」同「煽動擴音器」將會徹底被剷除。卡茲仲強調，以色列軍方已經提前透過電話向附近平民發出撤離警告，盡力減少平民傷亡。

另一方面，以色列軍方更喺行動後發布咗一條空襲嘅影片，展示精確炸毀停泊喺德黑蘭機場嘅伊朗F-14戰機，並成功摧毀載有武器同防空導彈發射器嘅軍事貨車。以色列總理內塔尼亞胡形容今次行動猶如「清除癌細胞」，強調以色列已經完全掌控伊朗領空，並聲稱伊朗嘅核計劃遭受重創，感謝美國協助攔截伊朗嘅導彈同無人機攻擊。

伊朗方面則強烈譴責以色列嘅襲擊行為，外交部發言人貝卡伊（Esmaeil Baqaei）指責以色列喺新聞直播期間攻擊媒體機構係「邪惡行為」，更形容為明顯嘅「戰爭罪行」。伊朗外交部長阿拉奇（Abbas Araghchi）聲言，伊朗軍隊將會以重拳反擊，以色列嘅襲擊一日未停止，反擊就會一日唔會停。

鑑於局勢急劇惡化，伊朗政府發言人莫哈傑拉尼（Fatemeh Mohajerani）今日宣布，為保障公眾嘅金融資產，伊朗證券交易所及金融市場即日起暫時關閉。

鑑於伊朗局勢已全面升級，加上以色列掌握咗伊朗嘅制空權，目前伊朗境內已經幾乎冇一處係安全嘅地方。美國、中國同俄羅斯罕有一致，緊急呼籲自己國民即刻撤離伊朗同以色列，以策安全。