美國總統特朗普（Donald Trump）打算將入境禁令進一步擴大，新增36個國家，其中多數係非洲國家，包括地區盟友埃及同吉布提（Djibouti）。

《華盛頓郵報》引述一份美國國務院備忘錄報道，新增入境禁令嘅36個國家當中，有25個係非洲國家，其他仲包括加勒比海、中亞同多個太平洋島國。備忘錄由美國國務卿魯比奧（Marco Rubio）簽署，並於上周六（14日）已經發送至相關國家嘅美國外交人員。呢份備忘錄明確表示，相關國家會有60日期限，要符合美國國務院提出嘅新標準同要求，並且需要喺周三（18日）之前提交初步嘅計劃。備忘錄提到，如果呢36個國家未能喺限期內達到要求，將會面臨美國嘅全面或者部分入境禁令。

備忘錄指控相關國家未能配合提供可靠嘅身份證明文件，或者存在大量政府詐騙行為；另外又指出，大量該等國家公民喺美國逾期居留、涉及未經申報或者居住要求嘅投資入籍，以及從事反猶太同反美國行為。除此之外，備忘錄亦批評相關國家拒絕配合美國快速接收被驅逐返國嘅公民。不過，如果有國家願意協助美國接收第三方國家被驅逐人士，將會有利緩和美國對佢哋嘅憂慮。

路透社引述美國國務院高層官員話，美國政府持續重新評估政策，目的係確保美國市民嘅安全，以及外國公民遵守美國法律。呢位官員強調，美國國務院會透過簽證程序，以最高嘅國家安全同公共安全標準保障國家同市民。

特朗普政府早前已經宣佈，由上星期一（9日）起，對包括阿富汗、緬甸、乍得、剛果、赤道幾內亞、厄立特里亞、海地、伊朗、利比亞、索馬利亞、蘇丹同也門等12個國家實施全面入境限制；另有7個國家，包括布隆迪、古巴、老撾、塞拉利昂、多哥、土庫曼同委內瑞拉，則受到部分入境限制。

特朗普喺社交平台上強硬表態，明言唔會容許任何有意傷害美國國民嘅人士入境美國，仲表示唔排除再修改名單，可能進一步加入更多國家。特朗普指控，上述國家窩藏大量恐怖分子，無法同美國合作提供安全可靠嘅簽證審查，包括旅客身份核實、犯罪紀錄保存不足同簽證逾期居留問題嚴重。

特朗普用日前喺科羅拉多州發生嘅汽油彈襲擊案作為例子解釋新措施嘅必要性。案中疑犯係埃及公民，美國聯邦官員透露，疑犯嘅旅遊簽證同工作許可早已過期。呢次唔係特朗普首次採取入境限制政策。佢喺第一次總統任期內，曾經宣布禁止7個以穆斯林為主國家嘅旅客入境，經過多次修改後，美國最高法院喺2018年支持特朗普政府嘅入境禁令。但2021年，當時新上任嘅總統拜登廢除該項政策，並批評特朗普嘅禁令係美國國家良知嘅污點。

針對美國嘅新禁令，索馬利亞表示願意同美國合作解決安全問題，索馬利亞駐美大使艾卜迪（Dahir Hassan Abdi）話，索馬利亞一直珍視同美國嘅長期友好關係，並隨時透過對話解決任何憂慮。不過，委內瑞拉內政部長卡貝略（Diosdado Cabello）就強烈批評美國政府，形容特朗普政府係法西斯政權，並警告留喺美國嘅委內瑞拉人將面對巨大風險，會遭受美國政府無理嘅迫害。