中國國家統計局今日（16日）公佈最新房地產市場數據，顯示內地樓價雖然仍然處於跌勢，但跌幅開始收窄，尤其一線城市中，只有上海逆市做好，北京、廣州、深圳則繼續受壓。

根據國統局數據顯示，今年5月份，全國70個大中城市嘅新樓售價按年跌幅有輕微收窄。其中，一線城市嘅新樓價格按年跌1.7%，跌幅較4月份收窄0.4個百分點。四大一線城市中，唯獨上海表現強勁，新樓價格按年升5.9%，相反，北京、廣州、深圳分別跌4.3%、5.8%、2.6%。至於二線、三線城市嘅樓市情況，跌幅都略為改善。二線城市新樓售價按年跌3.5%，收窄0.4個百分點；三線城市則跌4.9%，收窄0.5個百分點。

中古樓方面，一線城市價格按年跌2.7%，較4月份收窄0.5個百分點。具體而言，北京、上海、廣州、深圳分別跌0.7%、0.1%、6.6%、3.2%。二線、三線城市中古樓價格亦繼續下跌，分別按年跌6.1%及6.9%，跌幅稍為收窄0.4及0.5個百分點。

國統局新聞發言人兼國民經濟綜合統計司長付凌暉今日喺國新辦記者會表示，隨住中央各項「穩樓市」政策陸續落實，樓市整體上開始逐漸企穩，但目前仍處於調整期，市場信心尚待進一步恢復，供需矛盾亦有待紓緩，需繼續努力促進市場回穩。

不過分析認為，去年9月內地推出嘅樓市刺激措施，效果開始減退。雖然中美最近達成咗關稅暫停協議，但對整體經濟刺激作用有限，加上樓價跌勢持續，企業利潤收縮，員工收入受壓，置業需求進一步萎縮，市場活力持續不足，對政策制定者來講，仍係嚴峻挑戰。

瑞銀分析師張寧（Ning Zhang）上星期喺報告中表示，估計中國房地產市場2025年將繼續向下，但跌幅會比2024年輕微。瑞銀早前一項調查顯示，受訪嘅2500人中，大多數人仍然預期樓價會持續下跌，呢種預期心理可能會進一步壓抑購買意欲，並於未來幾個季度內繼續對市場產生負面影響。

上星期五，國務院總理李強召開會議時強調，會繼續出台措施，令房地產市場企穩。呢係中國最高層自去年9月首次提出相關政策後，再次作出同類表態。中國官媒稱，中央政府將持續協調現有及新增嘅財政及金融政策，全力支撐內地房地產市場，推動市場早日「止跌回穩」。