耶路撒冷郵報 (The Jerusalem Post)報導，以色列國防軍（IDF）喺本週五（13日）凌晨突襲伊朗境內超過100個軍事目標，證實行動代號為「獅子崛起」。以軍發言人艾菲德弗林（Effie Defrin ）準將喺記者會上指，伊朗近幾個鐘內向以色列發射逾百架無人機，儘管佢未有具體交代無人機幾時會到達，但回顧去年2025年4月類似事件，當時無人機需時數小時先至到達。

艾菲德弗林同時披露，以軍今次大規模還擊，派出超過200架戰機，對伊朗多個地點發射咗330多枚導彈，主要針對伊朗核設施同飛彈庫等軍事資產。佢強調，行動目的是為咗防止伊朗研製核武：「伊朗政權一旦掌握大殺傷力武器，對以色列國同全世界都會構成存亡威脅。」

自從去年2024年10月德黑蘭曾向以色列發動導彈襲擊後，以色列獲得美國、英國、法國等西方盟友支援防禦。不過，今次由以方主動出擊，屬於先發制人式攻擊，暫時未清楚有冇外國政府參與。

以色列國家安全委員會（NSC）提醒，伊朗及其代理勢力極有可能針對全球以色列人及猶太社群發動報復襲擊。呼籲海外以色列人採取多項預防措施，包括避免喺公共場合展示以色列或猶太標誌，亦應避免參與涉及猶太教或以色列嘅大型公開活動，並建議以色列人應少喺社交平台上透露自己嘅行蹤、位置或旅程安排，呼籲保持高度警覺，如遇可疑情況，應即時聽從當地保安部門指示。

美國總統特朗普喺星期五早上出面確認，以色列對伊朗展開「獅子崛起」行動之後，美方已作出部署，一旦以色列遭到報復攻擊，「美國一定會出手保衛盟友」。佢其後喺接受霍士新聞（Fox News）訪問時再強調，美國唔會接受一個擁有核彈頭嘅伊朗，「伊朗唔可以擁有核武，我哋希望佢哋回到談判桌。我哋會睇住事態發展。伊朗政權入面有啲人，應該唔會再有出場機會。」

美國國務卿盧比奧（Marco Rubio）就發表書面聲明，話美方並無參與今次針對伊朗嘅攻擊行動：「今晚，以色列係單方面行動。我哋無參與，我哋嘅首要任務係保護中東地區駐軍安全。」盧比奧補充話：「特朗普總統同我哋團隊已經做足準備，確保美軍安全，同時亦有同地區夥伴保持緊密聯絡。我想講清楚——伊朗唔可以試圖對美國利益或者人員出手。」

美國參議員克魯茲（Ted Cruz）亦喺霍士新聞表示支持以色列行動：「而家以色列透過摧毀伊朗嘅核設施，等於幫美國處理咗一個頭痛問題。」佢補充話：「呢一局會點樣收尾，我哋仍未知道，但可以肯定嘅係，一個擁有核武嘅伊朗，將對以色列同美國構成實質性威脅。」