歐盟對俄羅斯制裁行動再進一步，今次將矛頭直指中國。據《金融時報》及《彭博社》綜合報道，歐盟擬制裁兩間被指協助俄方繞過貿易限制嘅中國小型銀行，將係布魯塞爾首次直接針對非俄羅斯嘅第三國金融機構出手，等同正式對北京發出強硬警告。

據報道，歐盟委員會已經將相關措施納入第18輪對俄制裁草案，內容包括禁止兩間中國銀行同歐盟內金融機構進行任何形式交易，原因係佢哋涉嫌幫助俄方透過加密貨幣、貿易融資等方式，繞過歐盟對戰略物資輸出入嘅禁令。據悉，呢兩間銀行規模唔算大，總部位處中俄邊境一帶，名字暫時未公開。《金融時報》引述四位熟悉歐盟內部規劃嘅官員透露，歐盟掌握到有明確資金流動紀錄，證明呢兩間行涉及違規交易行為。草案目前仍需27個歐盟成員國一致通過，預計會喺6月26日於布魯塞爾峰會前作最後協調。

呢份制裁草案背後，其實係歐盟對中俄之間「另起爐灶」建立替代金融體系日益憂慮。報道指出，2024年中俄雙邊貿易總額高達2,450億美元，較2020年翻一倍，而俄羅斯對人民幣依賴愈來愈深，尤其喺能源、軍民兩用設備貿易方面，人民幣結算幾乎取代美元地位。有歐盟官員直言，歐洲唔能夠再等，否則自己主導嘅制裁體系將會變得無牙老虎。

據披露，草案除咗針對中國嘅銀行，仲涵蓋以下關鍵措施：

• 禁止歐盟金融機構同涉事中俄銀行進行任何交易；
• 擴大SWIFT封鎖範圍，新增22間俄羅斯銀行入全封清單；
• 限制「北溪」（Nord Stream）天然氣管道資金流，杜絕日後重啟可能；
• G7油價上限由每桶60美元減至45美元，並禁止進口第三國使用俄油加工製品（只限非盟友國）；
• 制裁更多中資企業及參與「影子船隊」運油業者；
• 加強出口管制，涵蓋軍民兩用設備、化學品及其他敏感物資。

歐盟委員會主席馮德萊恩（Ursula von der Leyen）意有所指咁話：「普京可以繼續打仗，全靠第三國撐腰。無論係邊個國家、邊個機構，只要協助俄羅斯侵略烏克蘭，都應該負上重大責任。」佢又話，新一輪制裁唔單止要針對俄羅斯，更重要係針對嗰啲俾後門嘅渠道，堵死所有逃避制裁嘅漏洞。

值得留意嘅係，呢份制裁草案公布時間正值敏感時刻——歐盟準備7月赴北京同中國國家主席習近平舉行中歐峰會。消息指，成員國之間仍未拍板究竟喺峰會上會唔會公開講到有關銀行制裁事宜。有官員坦言，未來一星期發展最大變數，就係美國總統特朗普會唔會喺下週 G7 加拿大峰會上表態跟進制裁。假如美方配合力度不足，歐洲內部一致性亦可能出現動搖。