大紀元引述彭博社報導，一間長年深耕中國科技市場、由美國富達投資（Fidelity Investments）旗下、由億萬富翁阿比蓋爾·約翰遜（Abigail Johnson）家族主導嘅風險投資基金「斯道資本」（Eight Roads），正計劃大規模撤出其喺中國內地嘅科技企業股權，甚至唔惜大幅折讓清倉。

消息人士向《彭博》透露，「斯道資本」係內地互聯網發展初期嘅活躍投資者，持有超過40間中國科企股份，而家已經著手出清持股。據講，佢哋出貨時甚至以高達六至八成嘅折讓出售，有啲股權喺巔峰時估值高達十億美元。當中包括內地自動駕駛技術公司小馬智行（Pony.ai）嘅股份。不過由於小馬智行仍處於禁售期，呢啲股份暫時未能轉讓。

消息指，斯道資本大撤退背後主要同中美地緣政治升溫有關。美國政府今年年初開始限制對中國高科技行業投資，之後總統特朗普又再揚言提高關稅，北京亦強硬反制，導致貿易戰火升溫，西方資金明顯轉趨審慎。

對於撤資一事，「斯道資本」回應《彭博》時話，因應監管環境轉變，早喺上年已決定唔再主動入場投資中國科技公司。而家得番一個較細規模嘅團隊，繼續打理現有股份，同時專注喺醫療保健行業方面發展，至於進一步評論，就婉拒答覆。

根據「斯道資本」官網數據，該基金喺內地持有約130間公司股份，總市值超過11億美元。全球方面，自1969年由約翰遜家族創立以來，佢哋已經喺印度、日本等地投資超過500間公司，管理資產逾110億美元。

據悉，今次大規模清倉動作，實際係該基金自上年裁撤十幾名中國科企投資員工以來，全面退出中國市場嘅後續步驟。消息指，現時內地團隊只剩約30人，其中大部分人集中喺醫療保健範疇，專做科技股嗰班只剩得4人。

「斯道資本」此次部署反映出西方資金喺中國市場所面對嘅重重困難。尤其係現時喺中國境內公開市場退出股份並唔容易，好多初創企業想海外上市都要經中國證監會審批，令流動性進退兩難。

至於邊啲人接貨？據了解，有興趣接手「斯道資本」中資科技股份嘅，包括幾間專注科企投資嘅中國本土私募基金，以及一間喺香港上市嘅金融公司，但交易仍處磋商階段，前景未明。

回顧一下「斯道資本」背景，佢原屬富達投資旗下嘅風險投資部門。富達係美國第三大基金公司，成立於1946年，主要服務北美投資者。其後於1969年開拓國際市場成立富達國際（FIL），1980年更脫離母公司成為獨立經營體，並易名為「富達全球投資」。雖然「斯道資本」喺2019年同富達國際分家，但依然透過富達資金網絡進行募資。現階段未見有另起爐灶自建資金平台嘅打算。