俄烏戰爭持續至今已踏入第1,204日，雙方當地時間昨日（9號）下午再一次進行戰俘交換。據報，一名被釋放嘅烏克蘭士兵除咗全身傷痕累累，仲被人喺腹部殘忍咁刻咗「榮耀屬於俄羅斯」嘅字樣疤痕。另一方面，俄軍針對平民區嘅攻擊仍未停止，烏克蘭第二大城市哈爾科夫市喺11日清晨再遭俄軍無人機襲擊，造成至少2死28傷。

烏克蘭官方運營嘅媒體平台UNITED24 MEDIA，喺官方Instagram帳號上轉貼咗一張令人震驚嘅相片，表示呢名烏克蘭士兵喺被俘期間遭到嚴重酷刑，身上密密麻麻咁佈滿傷疤，其中最駭人聽聞嘅係腹部竟然被刻咗「榮耀屬於俄羅斯」。

對於今次戰俘交換，基輔同莫斯科方面都證實咗呢個消息，但就無公開具體嘅交換人數。烏克蘭媒體引述官方說法指，基於安全考量，確切人數將喺程序完成之後再公佈。烏克蘭方面透露，今次獲釋嘅戰俘嚟自海、陸、空軍、國民兵、國家邊防局、國土防衛軍以及國家特別交通部。

基輔獨立報引述烏克蘭人權專員魯賓內茲表示，大部分獲釋人員係喺2022年戰爭初期被俘，包括三年前喺馬立波戰役中被俄軍擒獲嘅軍人。呢批獲釋嘅人員大多受重傷，當中唔少更有截肢或視力永久受損等嚴重後遺症。

烏克蘭國防情報局局長布達諾夫亦指出，俄羅斯今次釋放嘅烏克蘭戰俘，幾乎個個都帶住嚴重嘅傷患或疾病，例如截肢、槍傷、視力受損、細菌感染甚至慢性病等問題，更有部分戰俘被診斷患上肝炎同肺結核，情況非常惡劣。

另外，烏克蘭哈爾科夫市喺11日清晨再度受到俄軍無人機嘅猛烈襲擊，造成至少2人喪生、28人受傷。市長特列霍夫表示，俄軍對市內兩個地區發動咗17次攻擊，當中一棟五層高嘅住宅大廈超過15個單位起火，多棟建築受到破壞，仲可能有人被困喺瓦礫之下。根據衛報報導，其實早喺10日凌晨，俄軍就已經出動無人機同導彈，襲擊基輔同敖德薩，造成至少3死13傷，其中唔少民用設施包括一間產科病房同一座大教堂都遭到攻擊。

面對持續升級嘅襲擊，烏克蘭總統澤連斯基就直接批評美國總統特朗普一直保持沉默，強調烏克蘭需要嘅係實際行動支持，而唔係口惠而實不至嘅言論。澤連斯基更指出，基輔10個行政區入面有7區遭受攻擊，造成大範圍嘅破壞。

歐洲方面，歐盟於10日提議對俄羅斯實施第18輪制裁，以削弱其能源收入同軍事工業。歐盟委員會主席馮德萊恩（Ursula von der Leyen）建議，將俄羅斯石油價格上限由每桶60美元降至45美元，同時亦提到，石油出口占俄羅斯政府三分之一收入，「必須切斷這項資金來源」。