特斯拉創辦人馬斯克近日同美國總統特朗普關係急凍。特朗普前親信班農（Steve Bannon）爆料馬斯克曾經喺白宮衝鋒式「膊撞」直撞向財政部長貝森特肋骨，而特朗普事後得悉事件時就直言：「太過分（This is too much）」，班農甚至建議特朗普沒收Space X。

《紐約郵報》引述白宮班農爆料，四月中旬馬斯克應邀出席白宮會議，討論國稅局改革方案，與貝森特喺橢圓形辦公室向特朗普遞交各自提案。不過，特朗普最終選擇支持貝森特嘅版本，令馬斯克當場怒火中燒。班農回憶指，兩人一走出總統辦公室就即刻喺門口對罵，貝森特更直接鬧馬斯克係「徹頭徹尾嘅大騙子」，狠批佢提出要削減一萬億美元聯邦支出計劃根本係天方夜譚。馬斯克聞言暴怒，竟然一個衝鋒式「膊撞」直撞向貝森特肋骨，似足欖球比賽入肉攔截，引發白宮罕見肢體衝突。雙方隨即拉扯打鬥，現場職員手忙腳亂分開兩人，事件才得以平息。馬斯克當場被要求即時離開白宮，而特朗普事後得悉事件時更直言：「太過火啦！（This is too much）」

《華盛頓郵報》指出，貝森特馬斯克兩人嘅爭執，為特朗普和馬斯克嘅關係帶來麻煩，最終導致兩人近日關係破裂。《野獸日報》報道，班農喺事件後全力狙擊馬斯克，唔單止喺媒體公開質疑馬斯克吸毒，仲建議對其移民背景展開調查。特朗普傳記作家沃爾夫（Michael Wolff）指出，班農此舉目的係「重返戰場」，再次成為保守派陣營嘅主將。班農甚至公開呼籲特朗普引用《國防生產法》（Defense Production Act），發行政命令國有化馬斯克旗下航太企業SpaceX，建議美國政府應即時吊銷馬斯克嘅安全許可證，並暫停所有與其相關嘅聯邦合約。

事實上，外界對馬斯克對美國軍工、太空界影響力過大嘅擔憂並非空穴來風。《華爾街日報》報道，馬斯克同特朗普近期唇槍舌劍，特朗普揚言會取消政府同SpaceX簽訂嘅所有合約，引爆馬斯克激烈反擊。馬斯克一度公開表示，SpaceX將即時讓旗下飛龍號（Dragon）太空船「退役」，震驚NASA同五角大廈。雖然馬斯克之後改口，話唔會真係停用飛龍號，但傷害已經造成。

NASA內部官員表示，起初只當作笑話，但當馬斯克開口講出「退役太空船」時，氣氛即刻由娛樂轉為恐懼：「這就唔係玩笑，而係一個真正嘅危機。」五角大廈內部官員亦透露，當馬斯克發言後，辦公室內一片鴉雀無聲，大家對住望，然後低聲講：「唔好笑啦，呢個唔係《紙牌屋 House of Cards》，係真實美國國安風險。」

目前，美國太空總署（NASA）極度依賴SpaceX提供載人太空船服務，而五角大廈亦大量倚賴其火箭發射軍事與情報衛星。根據合約估算，SpaceX承包總值以十億美元計，涵蓋從國際太空站補給、軍方發射、情報衛星部署等關鍵任務。今次事件突顯出美國高度依賴SpaceX，一旦馬斯克唔合作，整個太空策略「就玩完」。一名前NASA高層指出，馬斯克一句說話就可能「掐斷」太空人通往太空站嘅唯一通道，令政府內部極為擔心。