中國國家統計局今日（9號）公佈最新數據顯示，5月份消費者物價指數（CPI）繼續低迷，按年再跌0.1%，係連續第四個月出現通縮，意味住五一黃金週同端午連假帶嚟嘅消費力，始終追唔上內需疲弱嘅拖累。今年2月起，雖然中國CPI跌勢放緩，由2月份嘅跌0.7%逐步收窄到而家嘅跌0.1%，但仍未能重返正增長，反映內地嘅消費市場仍未擺脫疲態。

據《彭博》引述統計局數據，5月份CPI跌幅與4月持平（跌0.1%），但跌幅細過經濟學家原本估計嘅0.2%。進一步睇細項，城市地區物價持平，農村地區就跌0.4%；食品價格跌0.4%，非食品價格則持平；整體消費品價格跌0.5%，但服務價格反而升0.5%。由1月至5月計，中國CPI平均按年跌幅為0.1%。至於企業生產方面嘅物價水平就更唔樂觀，5月份生產者物價指數（PPI）按年大跌3.3%，跌幅比4月份再擴大0.6個百分點。

《彭博》分析指，內地房地產市場持續低迷，令消費者減少消費，同時各行各業爆發價格戰，都令中國嘅通縮風險在未來幾個月內恐怕難以紓解。最新嘅例子係比亞迪，呢間中國最大電動車製造商，近日一口氣將多款純電動同插電式混合動力車型劈價高達34%，引起投資市場嘅震盪。資產管理公司Pinpoint分析指，除咗整體內需乏力，電動車市場激烈嘅價格戰，亦係拖累中國CPI回升嘅主要原因之一。要解決通縮問題，最終仍須靠政府大力刺激內需。

唔單止內需唔掂，中國嘅出口數據亦令人憂心。中國海關總署今日（9號）公佈5月出口數據，金額係3161億美元，按年增長4.8%，低過市場原先估計嘅5%。即使美國同中國上個月喺瑞士談判中達成共識，暫緩徵收關稅90日，更將關稅大削115個百分點，但受早前貿易戰影響，中國對美出口量仍大跌，5月份按年跌超過34%，係2020年2月以來最大跌幅。

上個星期四，美國總統特朗普同中國國家主席習近平進行咗約90分鐘嘅電話通話，雙方同意安排兩國貿易談判代表，喺今日（9號）喺倫敦舉行第二輪談判。中美關係能否解凍，仲要睇今日倫敦會談嘅成效，但無論如何，通縮嘅陰影已經籠罩中國，短期內消費市場回暖仍有重重挑戰。