中國經濟近期陷入低迷，甚至出現通縮現象，中國鷹派官媒《環球時報》前總編輯胡錫進認為，社會嘅「性蕭條」正係導致消費疲弱嘅其中一個重要原因，呼籲社會重視呢個現象。

胡錫進日前喺個人微博撰文表示，呢幾年經常見到有人討論「性蕭條」嘅問題，佢覺得呢個唔係小事，必須嚴肅睇待。佢指出，性蕭條與消費低迷關係密切，呼籲大家「對此不要羞於關聯，一定要實事求是」，並且認為現時嘅「『黃色』『色情』的標準不要盯得太寬泛」，應該從促進消費及整體社會治理嘅角度認真考慮呢個問題。

胡錫進話，正所謂「食色性也」，呢個係自古皆然嘅道理。如果社會嘅性活動持續萎縮，必定會大幅削弱人們嘅消費動機。佢舉例指，年輕人如果性趣缺乏，就自然會唔想去約會、唔想討好對方，更加無興趣喺異性面前展現魅力，連參加社交活動嘅動力都減少晒。佢又強調，性嘅幻想同埋性嘅聯想唔係全部都係污糟嘅，反而係刺激消費嘅重要動力之一，可以令社會更加積極活躍。

胡錫進進一步指出，如果年輕一代陷入「性蕭條」，就必然導致低慾望嘅生活方式。男士放工後只想宅喺屋企，女士連買靚衫打扮嘅意欲都冇。佢特別強調，必須承認性係刺激消費嘅重要媒介，「所以說，我們的社會還是要維護有利於『正常性繁榮』的氛圍，不要在性的問題上過度嚴厲，反對『萬惡淫為首』的舊觀念。」胡錫進更提醒，社會對於「黃色」與「色情」嘅標準唔可以太過嚴苛，以免扼殺咗性嘅自然環境，整體上應該顧及人性，從消費同治理嘅大局認真諗呢個問題。

胡錫進嘅觀點並非空穴來風，《三聯生活周刊》早前報道，北京大學及復旦大學嘅學者花咗足足三年時間，透過6,828份有效問卷，聯合完成咗一份名為「中國人私生活質量調查」嘅報告。

調查發現，中國大陸30歲以下嘅年輕男女，超過一成係過去一年完全冇性生活。而1970年至1994年出生、有配偶嘅男女，過去一年冇性生活嘅比例約為6%至9%，但「95後」就算有配偶，竟然有14.6%嘅男性及10.1%嘅女性，喺過去一年完全冇性生活，其中高學歷人士性生活更稀少。

《三聯生活周刊》分析，中國年輕人性生活減少可能有兩個主因：第一就係生活壓力。「996」嘅工作模式，即朝九晚九，每星期返六日工，令佢哋放工返到屋企身心俱疲，乜嘢都唔想做，只想躺喺張床度睇手機。第二個原因就係年輕人現今嘅娛樂選擇多咗好多，例如追星、養寵物、打機等等，令佢哋嘅興趣分散，性活動嘅需求同意欲都跟住降低。

中國年輕人面臨嘅「性蕭條」，一定程度上亦解釋咗點解當代年輕人嘅生育意願持續低迷。報道引述傳統嘅婚姻家庭研究指，性生活嘅頻率及滿意度，係維繫親密關係同家庭和諧嘅重要因素。年輕人性生活減少，意味住伴侶間重要嘅感情紐帶變弱，可能會導致離婚率攀升。

國投證券首席經濟師高善文早前就形容，現時中國最明顯嘅現象係：「生機勃勃的老年人，死氣沈沈的年輕人和生無可戀的中年人」，似乎都同胡錫進所講嘅「性蕭條」形成鮮明對比。