Nvidia準備為中國市場推出全新AI晶片組，屬於其最新Blackwell架構。根據多方消息，呢款晶片價格會比而家受到美國限制嘅H20型號平好多，有望最快喺2025年6月開始量產。Nvidia希望藉住呢步棋應對美國出口限制之餘，亦想喺中國AI晶片市場重奪主導地位，同時應對來自華為等本地對手嘅壓力。

據了解，新晶片定價大約喺6,500至8,000美元之間，較H20型號嘅10,000至12,000美元低約三成。降價主要因為規格上作出調整，加上製造程序簡化。根據《LiveMint》報道，Nvidia希望透過更具吸引力嘅價格打入中國數據中心同雲端運算市場。分析指出，Nvidia喺中國嘅市場佔有率已經由2022年前高達95%，跌到而家只剩一半，主因係美國出口限制同華為Ascend 910B等國產晶片激烈競爭。H20型號被禁更導致Nvidia損失咗大約55億美元嘅存貨同150億美元潛在收入，突顯中國市場對其全球業務至關重要。

為咗符合法規，新款晶片用咗傳統GDDR7記憶體，無採用高帶寬記憶體（HBM），記憶體頻寬被限制喺每秒1.7至1.8太位元組，明顯低於H20型號嘅4太位元組每秒。而且晶片亦無使用台積電嘅先進封裝技術CoWoS，避免觸碰出口許可紅線。根據《Newsweek》指出，呢款晶片好可能係基於NvidiaRTX Pro 6000D改良而成，潛在型號或為6000D或B40，專為中國市場量身打造。雖然規格有所妥協，性能未必及得上旗艦型號，但勝在唔會違反美國法律，可以合法出貨到中國。

多個消息來源都證實，Nvidia新一代Blackwell晶片預計會喺6月正式開始量產，Nvidia計劃喺同年9月再推一款針對中國市場設計嘅Blackwell晶片，顯示出佢哋對中國業務有長遠部署。雖然官方仲未公佈具體出貨日期，不過業界普遍估計，首批晶片最快今年下半年就會出現喺中國數據中心入面。

不過，Nvidia喺中國面對嘅挑戰一啲都唔輕。華為嘅昇騰已經喺市場上建立咗強大地位，而美國嘅出口政策無形中亦幫咗華為，令佢有更大空間發展本地市場。Nvidia行政總裁黃仁勳就曾經講過，出口限制令Nvidia「實際上被排除」喺中國呢個價值約500億美元嘅數據中心市場之外。新晶片能唔能夠幫Nvidia重返主流，關鍵要睇定價、性能同中國客戶嘅接受程度。

呢款新晶片喺中國潛在銷售額可達100億美元，對Nvidia未來財務有重大影響。2025年4月數據顯示，Nvidia喺美國AI市場佔42%份額，而中國加香港只得15.5%。雖然新產品定價較為進取，但市場人士提醒，若要重拾昔日近乎壟斷嘅地位，除咗價格之外，Nvidia仲要靠創新技術同政策配合先有機會。