美國特朗普政府22日宣布，撤銷哈佛大學招收國際學生嘅資格，預計影響超過6,800名現有學生，佔該校學生總人數嘅27%，可能導致呢批國際學生被迫轉校，否則將失去合法居留身份。國土安全部（DHS）部長諾姆（Kristi Noem）更進一步表明，唔排除全美其他大學亦會面對同樣嘅「禁收國際生」措施。

據《Politico》、《The Hill》同《Fox News》等美國主流媒體報導，諾姆指控哈佛大學「違反聯邦法律」，仲容許校內「支持恐怖主義同反美煽動分子」騷擾猶太學生，嚴重損害校園安全。諾姆又直接點名哈佛「與中國共產黨協調活動」，指責校方未能妥善保護美國國家安全。

國土安全部宣佈撤銷哈佛大學參與「學生與交流訪客計劃」（SEVP）嘅資格，禁止哈佛招收持F-1或J-1簽證嘅國際學生。要求哈佛必須喺72小時內提交過去五年所有國際學生嘅紀律紀錄，以及一切涉及非法或暴力活動嘅影片、錄音同電子文件，否則唔會恢復其SEVP認證。

喺致函哈佛校長加伯嘅信件中，諾姆直斥哈佛喺今年4月30日交畀國土安全部嘅紀錄「極之不足」，完全未符合基本嘅通報標準，並進一步批評哈佛「持續營造令猶太學生感到不安全嘅校園環境」，宣揚親哈馬斯嘅政治立場，同埋推行「具種族歧視色彩嘅多元、公平與包容（DEI）政策」，因此認為哈佛喪失咗呢項資格。國土安全部表示，佢哋已經畀咗哈佛兩次機會補交文件，但哈佛依然「完全忽視」第二次嘅文件要求。

受影響嘅學系中，哈佛嘅研究所課程將會受到最嚴重嘅打擊，例如甘迺迪學院有多達59%嘅學生來自美國以外嘅國家；國際學生喺陳曾熙公共衞生學院佔學生總數嘅40%，哈佛商學院亦有35%係國際學生。

哈佛校方立即發聲明反駁，指責特朗普政府呢個決定係「非法同帶有明顯政治動機」，嚴重侵犯哈佛大學嘅學術使命同全美嘅學術自由。校方強調會全力協助所有受影響學生，並已經緊急聯同律師團隊準備對聯邦政府提出法律訴訟。

今次撤銷哈佛SEVP資格，係特朗普政府近期針對哈佛嘅系列行動之一。較早前，聯邦政府已經凍結咗哈佛超過20億美元嘅聯邦資助，甚至揚言可能會取消佢哋嘅非牟利免稅地位。

目前，美國共有約110萬名國際學生，其中中國同印度嘅學生人數最多。多間大學同教育團體憂慮，特朗普政府呢個舉動可能只係開端，日後會擴大到更多學校，恐怕會嚴重影響美國嘅高等教育及國際聲譽。