長和計劃出售包括巴拿馬運河港口在內全球43個港口權益，包括位處中美洲戰略要地嘅巴拿馬運河港口。消息一出，北京大怒，開始用各種方式，批評並阻撓呢項交易。公司管理層今（22日）喺股東周年大會再一次強調，唔會進行不合法交易。

今次被長和放售嘅資產遍布全球23個國家，合共涉及43個港口、199個泊位，由於當中部分港口嘅地點敏感，尤其係巴拿馬嘅港口，外界關注呢筆交易可能涉及中國喺印太地區嘅戰略部署。

呢單交易仲觸動到港澳辦嘅神經，港澳辦官網最近多次轉載評論文章，公開批評長和出售港口權益嘅做法。國家市場監管總局亦明確表態，會依法對交易進行嚴格審查，警告交易雙方唔可以用任何手法規避審查，並強調未經批准前絕對唔可以進行集中，否則必須承擔相應嘅法律責任。

面對北京當局嘅高度關注，長和聯席董事總經理黎啟明喺股東會上解釋，今次交易確實要經歷大量嘅法律審查程序，長和亦會全面配合相關機構嘅審查，在未獲批之前絕對唔會推進交易。黎啟明更強調，集團早喺5月12日已經表明過，絕對唔會進行任何非法或者違規嘅交易。

早前，港澳辦主任夏寶龍喺澳門一場活動上發表講話，提醒港澳商界同企業家要立場堅定，唔可以遇到霸權打壓就輕易退縮，仲狠批有啲商人只顧賺錢，完全唔理國家利益，係典型嘅軟骨頭，呼籲商界要有就算戴住電子腳鐐都唔投降嘅硬骨精神應對挑戰。外界普遍認為夏寶龍呢番言論，暗指嘅就係長和出售海外港口呢單事件。

前全國政協委員劉夢熊亦發表意見，質疑長和管理層所講嘅「需經法律與監管機構批准」，實際上係指當地國家嘅法律程序，而並非係中國政府。劉夢熊提出質疑，呢啲港口本身唔喺中國領土範圍內，當初長和買入嗰陣都唔使經北京審批，點解現時出售反而要提升至國家安全層面處理。

劉夢熊仲建議，如果中國政府真係認為呢單交易有可能影響國家利益，最實際嘅做法係由國企例如招商局主動提出更高嘅收購價，自己掌控呢啲港口權益，而唔係透過政治施壓嘅方式影響企業嘅自由交易。

另外，喺股東周年大會上，長和主席李澤鉅表示，現時環球關稅政策持續轉變，造成市場動盪，集團將會持有更多現金同降低借貸比率，以應付未來不確定性。近期唔同國家嘅關稅變化同地緣政治緊張局勢，令國際市場出現好多波動，未來全球經濟發展方向難以預測，因此集團必須加強財務實力，以抵禦風險。

李澤鉅指出，持有較多現金、較少負債，係現時嘅穩健策略，尤其係面對另一場經濟壓力測試時，更能保證公司有能力應對。至於去年度長和嘅派息有所減少，今年嘅派息走勢又會如何，佢坦言，市場充滿不確定因素，現階段好難作出預測。