台灣男星吳奇隆同內地女星劉詩詩，今年年頭先至慶祝結婚十周年，表面上恩恩愛愛，但婚變傳聞就一直冇停過。尋日（20號），內地有個娛樂KOL突然爆料，話吳奇隆同劉詩詩「確實離婚了」，消息一出即時震驚微博，但事後該博主又急急刪咗篇文，搞到網友更加懷疑究竟係咪真係有事發生。一時之間，「曝劉詩詩吳奇隆離婚」嘅熱搜話題即刻衝上微博熱搜榜第一位，引發全城熱議。

吳奇隆同劉詩詩當年因為合作拍攝《步步驚心》而拍拖，劇中情侶延續到現實，兩人喺2015年結婚後，仲生咗個囝囝，乳名叫做「步步」，一直以嚟係娛樂圈出名嘅模範夫妻。

今次引爆婚變傳聞嘅內地娛樂博主喺微博發文時話：「ZXC和landy確實分手了、獅(以獅子頭像代替)和吳奇隆確實離婚了」，仲喺篇文尾度加咗「愛人先愛己」、「520快樂，好好搞事業都」嘅標註，令微博網友瘋狂估測，呢句話應該係暗示緊張新成同李蘭迪分手，以及劉詩詩同吳奇隆婚姻告吹。

不過，冇耐後，呢個娛樂博主又突然刪晒啲爆料，但刪文速度無論幾快都冇用，因為消息已經炸開咗喺微博，全網即時瘋傳，直接登頂熱搜榜冠軍。有網友估計，劉詩詩本來婚後淡出娛樂圈，但近期忽然密密接戲，會唔會係因為婚姻有變，令佢要衝刺事業、重新打拼？亦有人搞笑引用劉詩詩喺《步步驚心》飾演嘅馬爾泰·若曦嘅經典台詞：「臣妾倦了」，嚟暗示佢哋婚姻出現問題嘅原因。

其實呢對明星夫妻嘅離婚傳聞，之前已經屢傳不止。今年二月，就有消息指佢哋已經展開離婚手續，當時吳奇隆即刻出律師信，又換咗微博頭像騷婚戒，出盡辦法力證婚姻美滿。但因為劉詩詩一直冇正式回應，反而令傳言愈燒愈烈，最終兩人迫於無奈，同時喺微博發表聲明，強調：「我們一直都很好」，嚴正否認離婚消息。

當時，兩人一齊轉發咗律師信，仲發文回應話：「生活是自己的，本不想公開回應，但已經打擾到我們的生活和家人朋友，請不要再傳播不實的言論。我們一直都很好，謝謝大家的關心。」律師信入面亦都要求大眾「明辨是非，文明上網」。甚至連吳奇隆嘅媽咪都要出嚟親自否認，強調仔仔同新抱絕無婚變。

吳奇隆當時透過經理人公司，正式向該名網上博主發出律師信，指對方以漫畫形式含沙射影，捏造佢嘅情史，然後再經微博瘋狂轉發，對佢嘅個人聲譽造成嚴重傷害，要求立即停止侵權行為，刪除所有虛假同誹謗嘅內容，並且即刻公開向吳奇隆道歉。