日本正深陷一場罕見嘅糧食價格風暴。由2023年開始逐步發酵嘅白米供應危機，喺今年3月全面爆發，被日媒形容為「令和米荒」。白米價格年升幅高達92%，創下自1971年以嚟半世紀新高。全國多地出現超市限購、貨架清空，就連學校午餐都被迫用麵包代替。呢種情況唔單止衝擊民眾嘅日常生活，仲動搖咗日本一直以嚟引以為傲嘅米食文化。

事實上，米價飆升背後係多重結構性問題疊加嘅結果：一方面，農業人口老化，種植面積不斷收縮；2023年夏季嘅極端高溫，亦重創稻米嘅品質同產量。另一方面，日本白米喺海外市場大受歡迎，2024年上半年出口量激增至歷史新高2.4萬噸，令國內供應更加緊張。再加上2024年因「南海海槽地震」預警引發民眾瘋狂囤糧，加埋訪日旅客對日本米需求上升，令整體需求壓力大增。

除咗供需失衡，日本一直實施嘅778%高額進口關稅，長期限制外國米入市，令市場無法透過進口舒緩供應缺口。而農業協同組合（JA）採用嘅「後出價」定價制度，加上企業囤貨炒價行為，進一步推高價格波幅，造成市場嚴重失衡。截至今年3月，5公斤白米市價比一年前貴咗逾六成，部分地區甚至接近翻倍。

呢輪米價升勢對民生造成沉重壓力。根據全國大學生調查，98.3%受訪者表示深感物價壓力，超過一半人選擇節省餐飲開支。米果等傳統食品製造商亦因原料短缺面臨經營困難。不少網民狠批政府同JA體制僵化，甚至要求徹底檢討高額關稅政策，開放外米市場。

面對民怨四起，政府喺3月宣布動用糧食儲備，計劃釋出21萬噸儲備米，首批15萬噸喺3月中旬投入市場。雖然原意係為壓抑漲勢，但實際效果有限，截至5月初，5公斤米價格只係由4233日圓微跌至4214日圓，民怨依然未有緩解。日本政府最近亦罕有批准進口韓國米，係自1999年以嚟首次，但受到高稅率同物流限制影響，供應未見顯著改善。

風波未平，農林水產大臣江藤拓喺18日自民黨佐賀市集會上爆出驚人言論，話自己從未買過米，因為「支持者送得太多，甚至可以拎去賣」。呢番話即時引爆輿論，被批評完全唔理民間疾苦。在野黨隨即猛烈炮轟，要求佢引咎辭職。

首相石破茂喺19日同20日連續兩日就事件公開道歉，表示係由佢任命江藤做農相，因此對造成國民不安感到深切歉意。佢強調，當前米荒問題嚴峻，政府責無旁貸，必須儘快提出有效對策。同日，石破茂召見江藤拓入官邸嚴斥，江藤事後表示已經深切反省，並收回失言言論，承諾未來會專注穩定米價。

不過，危機尚未見緩。根據《NHK》報道，日本全國超市5公斤白米均價已升至4268日圓，比上星期再升咗54日圓，顯示價格仍然上行。石破茂喺20日再度被追問會唔會撤換江藤拓，佢表示理解民眾嘅失望，但認為江藤當下最重要嘅責任，係做好農林水產大臣嘅本份，實質壓低米價。

面對呢場牽動民生同政局嘅糧價風暴，日本政府已經無法再用「應急處理」來拖時間。改革農業結構、檢討關稅制度、重建米食供應鏈嘅呼聲，已經成為社會共識。否則，「米荒」可能唔止於令和，仲會成為日本社會同經濟長期嘅脆弱點。