美國財政部長貝森特（Scott Bessent）近日接受CNN訪問時表示，喺同美國傾貿易協議嘅時候，如果缺乏誠意，美國將會即刻恢復徵收「對等關稅」，不過佢冇詳細講明何謂「誠意」。

貝森特強調，美國目前主要係集中精力處理18個重要貿易夥伴嘅談判，任何貿易協議嘅落實時間，都係視乎有關國家有冇用真誠態度去傾。佢又警告，對於冇誠意嘅國家，美國會寄出附上新關稅稅率嘅信函，所以希望各國好自為之。

早前有傳媒報道美國總統特朗普（Donald Trump）有意接受卡塔爾贈送嘅波音噴射機，貝森特就形容呢件事就好似1886年法國送自由神像畀美國一樣，但佢表示唔清楚卡塔爾方面有冇要求回報。

至於穆迪日前將美國主權信用評級由「Aaa」降至「Aa1」，並將前景評級由「負面」調整至「穩定」，貝森特就表示，穆迪嘅評級係「落後指標」，調低評級並非針對特朗普重返白宮後嘅施政，而係因為前拜登政府喺過去四年嘅龐大開支所導致。

另一方面，美國最大嘅零售商沃爾瑪近日就表示，由於關稅令成本上升，月底起可能要調高部分商品嘅售價。特朗普喺社交媒體「真實社群」發文批評沃爾瑪，要求佢哋同中國「自行消化關稅」，唔好將成本推畀消費者。

特朗普表示：「沃爾瑪唔好再賴關稅，當作全面加價嘅藉口。去年沃爾瑪賺咗幾十億美元，仲超過市場預期。」佢仲話：「沃爾瑪應該同中國自行解決關稅問題，唔係將成本轉嫁畀消費者。我會睇實你哋，你哋嘅顧客都會睇實你哋！」

沃爾瑪行政總裁董明倫（Doug McMillon）上個月曾經同多位零售業高層見過特朗普，據消息人士透露，董明倫當時已經提醒特朗普，關稅將直接導致商品加價。

董明倫15日亦同分析員開電話會議，指因為零售業嘅利潤本來已經非常薄弱，公司實在無法全面吸收關稅帶來嘅成本，不過佢強調，沃爾瑪會盡力確保受到關稅影響嘅中國製商品唔會推高食品價格。

董明倫又喺會上感謝特朗普近日喺美中貿易方面取得嘅進展，並期望未來能達成更持久嘅協議，減輕關稅壓力。

沃爾瑪發言人17日回應時表示，公司會繼續致力維持最低售價，喺利潤微薄嘅情況下，會盡最大努力將商品價格控制喺最低水平。

除咗沃爾瑪之外，其他企業亦陸續宣布將調升產品價格。福特汽車已經公佈會上調三款熱門車型嘅售價，而名牌奢侈品愛馬仕亦表示會提高喺美國嘅售價，市場估計仲會有更多公司跟隨。