曾被譽為越南女首富、華裔地產女王嘅張美蘭（Truong My Lan），因捲入越南史上最大宗金融詐騙案，喺今年四月正式被胡志明市法院判處死刑。判決震驚亞洲金融圈，唔少投資者至今仍血本無歸。呢位曾呼風喚雨嘅商界女強人，最近喺獄中透過律師發信畀越南官方，一封交到負責管理佢資產嘅特別委員會手上，內容引爆爭議——佢話自己嘅資產被政府「估錯價」，嚴重貶值，唔止蝕咗國家，仲侵蝕咗佢嘅合法權益。

✉️ 「你哋估得太低！」張美蘭獄中親筆信力陳不公

張美蘭喺信中聲稱，政府委託咗一間公司對佢726項資產做估值，得出總值大約97億美元（折合約765億港元），但佢話：「根據新土地價格標準，我嗰啲市中心靚地起碼值3至5倍！」

佢仲提到自己仲有440項未被估值嘅資產，估計至少可以再「回水」77億美元畀政府。佢咁講：「我喺地產界玩咗30年，對市場同法律都好熟，我有信心可以將啲資產變成『下金蛋嘅鵝』，幫政府收返成本！」

👑 女富豪如何殞落？西貢商業銀行爆煲震撼全越南

張美蘭係萬盛發集團創辦人兼主席，多年喺胡志明市炒地產、搞餐飲、做商場，風頭一時無兩。2011年，佢仲獲得越南國家銀行批准，將三間資金緊絀嘅細銀行合併，成立咗西貢商業銀行（SCB），更進一步掌控金融命脈。

但2022年10月，呢位「越南李嘉誠」突然被捕。當局指控佢聯同SCB高層，用詐騙手法操作超過2500宗虛假貸款，非法挪用銀行高達125億美元（約974億港元）資金，轉去佢旗下公司。

更誇張嘅係，案件總體造成270億美元（即約2105億港元）損失，相當於越南全年GDP約6%。成間銀行爆煲，數以萬計投資者資產蒸發，震撼越南社會。

💰 官方開價110億美元免一死

有傳越南檢察機關早前曾暗示，如果張美蘭肯拎出110億美元（約857億港元），可以免受死刑處分。4月3日當局交代，目前已經從佢手上收返大約8萬億越南盾（約3.09億美元）資產，將來會繼續向其他持有佢資產嘅個人或組織追討多15萬億盾。

張美蘭係地道越南華人，祖籍中國廣東汕頭，喺西貢（即今日胡志明市）土生土長，1992年創辦萬盛發集團，從地產發展開始起家，一步步成為越南財圈要角。佢丈夫朱立基係香港人，有傳背後幫佢打通不少金融關係。到2011年，佢成為政府信得過嘅銀行「白武士」，仲獲准操控銀行合併，攞到西貢商業銀行話事權。