英國各種移民簽證入籍年期要求不同，其中唔少為「5+1」，即在英5年後取得永久居留，再1年後入籍成為公民。英國政府12日發表最新一份《移民白皮書》，預告全面收緊移民政策，將永久居留申請門檻由5年提升1倍至10年，並將引入積分制，視乎申請者貢獻而決定年期，有貢獻者年期將較短。內政大臣顧綺慧（Yvette Cooper）表示，新例唔適用於已經喺英國嘅移民。

白皮書未有具體講述新改動是否影響所有簽證通向永久居留途徑，例如是否會影響到屬「5+1」嘅BN(O)簽證，僅指將繼續為英國公民嘅非英籍受養人提供較短嘅5年門檻，又會保留弱勢群體包括家庭暴力同虐待受害者嘅定居權利。《追新聞》查問英國內政部，但只收到英國首相施紀賢記者會講稿，冇正面回應持有BN(O)簽證港人會否受影響。

白皮書數據顯示，截至2023年6月，英國淨移民人數創歷史新高，高達90萬人，較2019年嘅22.4萬人多咗四倍，估算到2024年6月仍然有成70萬人。自2021年英國政府推出BN(O)簽證計劃，作為對中國撕毀《中英聯合聲明》、實施《港區國安法》嘅回應，截至2023年底，累計已批出近22萬宗申請，估計有超過16萬港人已經移英。

白皮書提到，將會提高唔同移民途徑所需嘅英文水平，擴大「計分制」，仲會改革永居（Settlement）同入籍（Citizenship）機制，並重新檢視《英國生活知識測試》（Life in the UK Test）。

白皮書特別提到，英國會一如以往咁，為真正有需要嘅人士提供庇護，點名提及香港人同烏克蘭人係透過人道通道嚟到英國，但並冇講清楚，日後申請永居或入籍嘅香港人，會唔會豁免英文要求或者唔適用於新計分制度。

保守黨議員Nick Timothy喺國會上指出，未來可能有多達200萬名移民有機會獲得永居，而工黨曾經話會修改條例防止呢種情況發生。內政大臣顧綺慧就稱，新例唔適用於已經喺英國嘅移民。

英國港僑協會創辦人鄭文傑接受訪問時話，《移民白皮書》要由草案變成法例，唔太可能喺今年內完成。佢認為「10＋1」可能只係針對特定簽證類別，未必適用BN(O)，但相信申請條件會嚴格咗，例如英文要求可能升至B2水準，仲可能納入社區參與、志願工作等審核條件。

協會董事Jason Chao建議有意申請永居嘅港人應按自己英語水平報考適合嘅試，避免政策變動時措手不及。至於《英國生活知識測試》合格證書係永久有效，提早考取有好處。

The Hong Kong Scots創辦人郭子健指出，雖然白皮書冇直接講到BN(O)，但語氣同態度都反映政策開始轉向。香港民主委員會（HKDC）高級國際倡議幹事劉珈汶亦喺社交平台發文，指出BN(O)政策究竟會唔會被納入標準永居門檻之內仍屬未知之數，提醒所有移英港人要主動聯絡選區議員表達立場，為自己發聲。