港澳辦主任夏寶龍喺澳門展開考察行程，同當地工商界見面時，警告港澳工商界要同祖國同一陣線、敢於鬥爭，應對美國單邊主義同貿易保護主義抬頭。香港特首李家超就喺中東隔空「擦鞋」，稱會帶領特區政府、工商界同企業家提升政治站位，強化擔當精神，全力落實中央要求。

夏寶龍現身中國與葡語國家商貿服務合作綜合大樓，出席工商界座談會，澳門特首岑浩輝親自到場迎接。現場有21位澳門工商界代表發言，分享對澳門經濟多元發展方向嘅意見。夏寶龍強調，港澳企業一向有愛國愛港愛澳嘅傳統，佢提出：資本無國界，商人有祖國，企業要企喺歷史正確一方，堅定撐祖國、勇於鬥爭，先可以喺風浪中突圍，迎向未來發展。

澳門經濟財政司司長戴建業會後話，夏寶龍對港澳企業家過去為國家發展作出貢獻表示高度肯定，仲提出喺中美角力底下，大家更要堅定信心，一齊同行。戴建業指出，大家要團結，同祖國企同一陣線，唔好諗住退讓妥協可以有出路，要勇於鬥爭，咁先至有機會爭取發展。

有參與座談會嘅企業代表引述夏寶龍講話，話今次同工商界嘅會面係佢整個澳門行程入面最重要嘅一日。佢向企業家提出四點期望：第一，要發揚鬥爭精神；第二，堅定發展信心；第三，發揮港澳本身嘅優勢；第四，要對外講好港澳故事。

澳門供應商聯合會會長葉紹文提到，有唔少年輕企業家發表意見，有啲來自橫琴，有啲喺澳門經營，亦有喺兩地來回走動，大家交流氣氛融洽。澳門銀行公會主席賈天兵就講，唔少企業喺澳門註冊、橫琴做研發，甚至喺珠海設廠，三地聯動，係打造新發展優勢嘅關鍵。

今次會面歷時接近三小時，除咗工商界之外，亦有橫琴醫療科技界代表參與。澳門施政報告亦提到，未來會加大招商引資力度，推動橫琴粵澳深度合作區建設。會後夏寶龍轉場參觀澳門旅遊大學，親自落場同學生交流。學生鄭梓軒表示，夏寶龍認為年輕人充滿朝氣，希望佢哋多關注國家建設，為祖國出力。佢仲參觀咗校內拉糖工藝展、賓館客房同圖書館，並喺校內用晚餐。

至於喺中東訪問緊嘅香港特首李家超，都有即時回應，話會帶領特區政府、工商界同企業家提升政治站位，強化擔當精神，全力落實中央要求。

李家超喺社交平台撰文提到，夏寶龍提出四點希望：一係要發揚鬥爭精神，團結愛國護港護澳；二係要堅定發展信心，扎根本地做大做強；三係發揮港澳優勢，打開局面擁抱世界；四係向海外講好港澳故事，發聲為中國。

李家超強調，無論政府定社會各界，尤其係工商界，都要有祖國喺心，堅守國家安全底線，遇上地緣政治風浪，要清晰表達國家立場，發揚鬥爭精神，撐國家護香港。同時，亦要主動識變應變求變，積極對接國家戰略，發揮香港內聯外通嘅獨特角色。