北京迎來第四屆中國－拉丁美洲和加勒比國家共同體（CELAC）部長級會議。呢場會議唔單止回顧過去十年嘅成果，仲為未來深化關係鋪路。美中博弈愈演愈烈嘅大背景下，喺拉美究竟邊個先有更大「話事權」？

今次會議規格明顯升級，除咗部長級官員雲集，據報多位拉美國家元首親自飛抵北京，陣容堪稱豪華。中國國家主席習近平喺開幕式上發表主旨講話，勾勒共同發展與和平合作嘅願景，外交部長王毅則親自主持會議。據官方消息，拉美同加勒比地區約20國派出高級代表，仲有墨西哥、古巴、委內瑞拉、洪都拉斯等至少17國嘅外長或特使。元首臨場嘅盛況喺中拉論壇史上可謂罕見，令人不禁揣摩：呢個係因為中國人民幣嘅魅力攻勢，定係拉美對多元合作嘅真心擁抱？

會議涵蓋經濟、貿易、投資、基建同多邊合作等多個領域，兩大文件成為焦點。首先，《北京宣言》重申中拉致力於和平、發展同合作嘅承諾，高舉多邊主義同南南合作大旗，旗幟鮮明反對單邊主義同保護主義，勾勒出中拉命運共同體嘅藍圖。話雖動聽，呢言能否抵禦地緣政治嘅風暴，確實令人拭目以待。另一份重頭戲係2025-2027年共同行動計劃，堪稱未來合作嘅路線圖，內容包羅萬有，從科技創新、經貿投資、人工智慧、金融合作，到基建、農業糧食安全、工業同資訊化、能源礦產，甚至共建「一帶一路」，無一不備等等等等。講就計劃宏大，野心勃勃，但執行結果係點，就要睇落地嘅真章。

「一帶一路」倡議喺會議上亦有新動態，多國表達濃厚興趣，其中哥倫比亞積極表態，據報可能成為新成員。而巴拿馬就傳出因為美國壓力而步伐放緩，此消彼長之間，突顯咗拉美係中美之間嘅微妙平衡。雙邊合作方面，巴西非常積極，簽署咗農業、科技、衛生等多項協定，包括共建疫苗研發中心、生物製藥生產同醫療設備採購等重要項目。中國更宣布恢復自巴西5家企業進口大豆，穩住巴西呢個「南美糧倉」嘅出口命脈。中國亦希望係多國對港口、鐵路、通信等領域進行投資。

不過中國所帶來嘅投資模式亦非常多嘅隱憂，令人質疑拉美係唔係跌落緊債務、同貪污陷阱。以往例子顯示，中國嘅款會導致受援國家嘅債務加重，斯里蘭卡因就因為無力償債將漢班托塔港租予中國，變成左現代版嘅「租界」。亦有馬來西亞東海岸鐵路，因為高成本同唔透明嘅交易而被重審，滋生貪污。部分項目經濟效益亦值得質疑，例如老撾高鐵票價過高，大白象嘅建設或同當地需求脫節，民眾難以負擔，但環境就先被破壞。

筆者最後希望拉美國家，可以走出一條真正為人民帶來幸福嘅發展之路，確保合作透明、可持續，平衡經濟效益嘅風險，避免成為另一大國嘅經濟消耗品。