近年，香港經濟持續低迷，政府推動嘅經濟政策未見成效，餐飲業首當其衝。33年歷史嘅本地餐飲品牌「海皇粥店」近日宣布全面清盤，引起業界震動，更引發內地餐飲品牌借機進軍香港市場嘅討論。與此同時，平價餐飲如兩餸飯卻意外崛起，成為市民自救嘅新飲食模式。

香港自疫情以來經濟復甦緩慢，就算全面通關超過一年，市民消費模式卻持續向北轉移，令本地零售同餐飲業面臨沉重打擊。特首李家超日前表示，政府舉辦嘅國際七人欖球賽、藝術三月等盛事，成功吸引超過千萬旅客訪港，就話已對經濟產生積極影響。但係呢啲旅客大多集中於尖沙嘴等核心旅遊區域，對新界及非核心地區嘅小型餐飲業幫助有限。許多業主直接指出，政府所謂「盛事經濟」對佢地毫無實質幫助。

有業主甚至嘲諷超哥：「特首話我哋識『食腦、有橋』，不如佢教我哋點救間餐廳？10蚊叉燒飯都出埋，我仲有咩橋？」餐飲聯業協會會長黃家和亦指出，今年三月更有約300間食肆結業，預料四月情況更嚴峻，政府嘅樂觀預測與業界現實情況明顯脫節。

作為香港首家現代化管理嘅連鎖粥店，海皇粥店自創立以來便以新鮮、快捷、親民著稱，成為香港餐飲界嘅象徵。然而，近年租金飛漲、原料成本上升，以及顧客消費習慣轉變，令海皇經營壓力激增。創辦人坦言，即使動用超過三千萬港元私人資金，甚至賣掉自住物業填補虧損，仍未能挽救業務。

在海皇退場之際，內地餐飲品牌迅速崛起，虎視眈眈香港市場。內地著名品牌如廣州「粥公粥婆」、上海「曼玲粥」、北京「嘉和一品」等，紛紛透過加盟制及靈活營運模式，在內地迅速擴張。其中曼玲粥憑藉24小時營業及強大嘅外賣平台，在內地年輕市場廣受歡迎，更積極布局香港、台灣及東南亞市場。

香港餐飲業人士擔憂，本地品牌退場後，內地品牌乘虛而入，進一步壓縮本地業者嘅生存空間。「如果內地品牌利用大巿場壓成本嘅經營模式，成功打入香港市場，對傳統小食店將係致命嘅衝擊。」一名經營新界食肆嘅老闆表示。

同傳統餐飲品牌嘅困境相反，兩餸飯作為香港經濟低迷下嘅產物，就意外成為市民和業者嘅自救方案。事實上，兩餸飯早於2000年已出現在大學飯堂，2003年沙士期間首次流行。近年經濟衰退，兩餸飯憑藉價格實惠、選擇多樣，迅速成為市民「平、靚、正」嘅飲食首選。

根據統計，全港兩餸飯店已增至568間，呈現「執一開二」嘅景象。兩餸飯店不僅滿足咗學生、打工族同家庭嘅需求，亦因為佢地嘅經營模式靈活、成本控制得宜，係租金同原材料成本壓力之下仍然可以存活同擴展。

不過，兩餸飯店嘅經營並非毫無困難，原材料價格持續上漲及競爭激烈，都為老闆帶嚟不少挑戰。唔少店主紛紛透過簡化菜單、縮短營業時間，引入數碼支付同外賣平台應對經營壓力。

業界期望政府能提出更實質嘅支援措施，包括租金補貼，或者稅務減免等政策，協助中小企度過難關。「政府唔係淨係搞盛事就得，政策上要實際幫到我哋，例如降低成本同鼓勵市民留港消費，先至真正有效。」餐飲聯業協會黃家和如是表示。

如果政府可以聽民意，提供更切實嘅支援措施，同改善政策及執法嘅靈活性，香港餐飲業或者能逐步走出困境，重現昔日繁榮景象。