今年迎來第二次世界大戰歐洲戰場勝利80週年，俄羅斯將於今日舉行盛大嘅紅場閱兵，紀念「勝利日」。中國國家主席習近平應俄羅斯總統普丁邀請，於5月7日抵達莫斯科，展開為期三天嘅國事訪問，並同普丁會晤，強調深化中俄戰略夥伴關係。呢次係習近平自2022年俄烏戰爭爆發以嚟第三次訪俄，突顯兩國喺國際局勢中嘅緊密聯繫。

習近平此行嘅重點包括參加紅場閱兵儀式、推進天然氣管線工程，以及深化兩國喺金融、能源同北極航道開發領域嘅合作。雙方強調會使用本國貨幣進行雙邊貿易，以減少對美元嘅依賴，共同反對單邊主義與霸權行為。習近平喺抵達莫斯科機場時發表書面講話，強調「中國同蘇聯分別係亞歐主戰場，為世界反法西斯戰爭勝利作出決定性貢獻」，並強調要弘揚「正確二戰史觀」。

然而，習近平此訪也面臨一定風險。7號，佢抵達莫斯科前夕，烏克蘭對莫斯科周邊進行咗多次空襲，導致4座國際機場一度暫停航班起降。中國外交部發言人林劍喺例行記者會上對此事保持低調，僅重申「當務之急係避免局勢緊張升級」，並未正面回應對習近平安全嘅相關提問。

為迎接習近平及其他外國政要，俄羅斯片面宣佈喺5月7日至9日停火3天，但烏克蘭方面形容呢種停火係「作秀」，並強調無法保證參加閱兵式嘅各國政要安全。烏克蘭國防部更喺6日發出公開警告，指出任何國家如果派軍人參加俄羅斯嘅紅場閱兵，恐怕有違佢地所講嘅中立性。呢番話被認為係針對中國，因解放軍儀仗隊已確認會參加莫斯科及白俄羅斯首都嘅閱兵活動。

政治觀察家普遍認為，習近平此行對普丁嚟講具有極高嘅外交象徵意義。華府智庫史汀生中心（Stimson Center）中國專家指出，中俄此刻正試圖將自己定位為二戰後國際秩序嘅「捍衛者」，藉此對抗美國嘅「單邊主義同霸權」。有俄國政治分析師都認為，5月9日嘅「勝利日」唔單止係對二戰歷史嘅紀念，更係普丁展示「俄國未被孤立於世界舞台」嘅重要機會。

同時，喺台灣，總統賴清德8日則首次以總統身份主持歐戰結束紀念活動，呼籲國際社會團結對抗威權主義。佢喺演說中特別提到：「和平係無價嘅，戰爭無贏家，歷史已經教導我哋，無論出於乜嘢原因或意識形態，對他國發動軍事侵略都係不義之舉，最後都係會失敗。」

台灣外交部亦喺同日發表聲明，重申台灣作為民主自由體系嘅一員，會繼續與志同道合嘅國家合作，捍衛國際秩序同法治原則。分析人士指出，呢場紀念活動顯示台灣正積極尋求同歐洲強化關係，以應對來自中國嘅政治壓力。

相反習近平喺訪俄前夕曾喺俄媒發表署名文章，強調「正確二戰史觀」，並重申台灣係中國嘅一部分，引用聯合國2758號決議，強調「台灣回歸中國」係「不可阻擋嘅歷史大勢」。呢番言論引發台灣方面嘅強烈反應，再次凸顯兩岸之間嘅緊張局勢。