經過三年艱難嘅談判，英國同印度終於正式達成一項極具意義嘅自由貿易協定（FTA）。呢項協議唔單止會促進兩國經濟增長，仲會為企業同消費者帶嚟實質嘅利益，標誌住英國脫歐後嘅一大經濟突破。

自2022年英國正式脫歐後，英印自由貿易協定嘅談判就正式展開，目標係充分發掘印度作為全球增長最快經濟體嘅潛力，最大化雙邊貿易同投資嘅機會。呢次談判經歷多次會議，當中涉及關稅、知識產權、數碼貿易、原產地規則同勞工流動等多個複雜議題。最終，雙方喺2025年3月重啟談判後，係倫敦確定左協議嘅細節，由英國商務及貿易大臣韋諾韜（Jonathan Reynolds）同印度商務及工業部長戈亞爾（Piyush Goyal）共同簽署。

呢項協定預計會令英印雙邊貿易額由目前嘅426億英鎊增至2040年嘅681億英鎊，為英國經濟每年增加48億英鎊嘅國內生產總值，並為勞工帶來22億英鎊嘅工資增長。對印度而言，協議會推動其紡織、珠寶同資訊科技等產業嘅出口，預計到2030年雙邊貿易額可達1200億美元。

協議嘅核心係大幅降低關稅。印度承諾對90%嘅英國商品降低關稅，其中85%會喺十年內免稅。英國威士忌同杜松子酒嘅關稅會由150%降至75%，並喺十年內進一步降至40%。汽車關稅則由超過100%降至10%，呢啲配額制優惠將會惠及英國汽車製造商。反過嚟，英國會對99%嘅印度商品提供免稅待遇，特別利好印度嘅紡織品、海鮮、皮革同珠寶等產業。英國消費者會因進口商品價格下降而受惠，例如冷凍蝦同服裝等。

協議仲允許每年最多1800名印度專業人士，例如廚師、瑜伽導師，獲得簽證，並為臨時派駐英國嘅印度勞工提供三年免繳國民保險費嘅優惠。不過，呢個安排引發部分英國政界人士嘅不滿，前英國獨立黨領袖批評呢個安排係“出賣英國勞工”，保守黨黨魁柏丹娜（Kemi Badenoch）亦質疑當中嘅公平性。但英國政府強調，協議保護咗英國嘅移民政策同食品安全標準。

印度作為全球第五大經濟體，預計喺未來數年內會躍升至第三大，對於英國呢個全球第六大經濟體嚟講，無疑係一個非常大吸引力嘅貿易夥伴。呢份協議亦被視為自由貿易嘅一次勝利，由其喺特朗普嘅關稅政策所引發貿易困局之下，為全球經濟帶嚟咗一線曙光。英國工業聯合會（CBI）行政總裁認為，呢份協議為英國企業喺印度市場打開咗「無數」機遇，成為「希望燈塔」，值得高度重視。