特朗普嘅貿易顧問納瓦羅近日接受英國《每日電訊報》專訪，直言中國如同「吸血鬼」，警告英國同歐盟唔好因短期經濟利益而加深對華貿易，否則恐怕會淪為中國傾銷商品嘅替代市場。

納瓦羅話：「中國係全球最大嘅騙子，佢用無條件經濟援助嘅包裝，實際暗藏長遠且難以抽身嘅政治代價。」佢點名英國逐步受中國「恩賜」影響，特別提到鋼鐵、汽車同綠能設備等領域，有可能成為中國過剩產能嘅落腳地。

呢番言論出爐之際，正值英國同歐盟準備舉行高峰會，並透露會喺食品法規、碳交易、科技安全等領域深化合作。同時，英美之間嘅貿易協議談判亦持續進行中。

納瓦羅延續特朗普政府一貫對歐強硬立場，批評歐盟係「設障機器」，阻撓美國產品進口，並警告話：「如果英國喺食品標準、技術規範等敏感議題上唔肯讓步，就要準備承擔代價。」

食品標準成為英美談判焦點。現時英歐禁止進口經荷爾蒙處理牛肉同氯水清洗雞肉，納瓦羅話，呢啲限制若唔放寬，將影響整體協議進度，美方耐性有限。

英國政府回應表示，會以審慎態度處理對華關係，堅守經濟同國家安全原則，又強調英國唔會喺美歐中之間被迫「選邊站」，三者都係英方重要嘅經貿夥伴。部分英國政策圈已經對「跨大西洋選邊壓力」感到憂慮。對英國脫歐後重建全球貿易網絡構成左進一步阻力。

副總統萬斯日前亦表態對英美貿易協議「保持樂觀」，但未提出時間表。英國財相里夫斯上月訪美時，雖然公開支持特朗普對中國貿易手法嘅批評，但同時明言唔會犧牲英國食品同數據私隱嘅安全標準。