五一黃金周大批內地遊客湧港，「窮遊」現象引起市民關注。唔少內地旅客晚上選擇留宿於麥當勞或者露營，記者問及呢種新旅遊模式對本港經濟嘅幫助，行政長官李家超表示，內地遊客嘅旅遊模式多元化，作為好客之都，香港應該畀遊客感覺係歡迎佢哋，而唔係只歡迎某一類高端遊客，否則會影響香港嘅整體形象。

行政會議自復活節假期休會後，今日正式復會。李家超見記者時表示，今年五一假期有約110萬名遊客訪港，較去年同期增加22%，內地遊客人數增加兩成，非內地遊客更增加三成。最高峰係5月2日，單日有26.7萬名遊客入境，其中內地遊客按年上升四成，非內地遊客則按年上升44%。

《now新聞台》記者問及內地遊客以「特種兵」模式訪港，例如露宿麥當勞或露營，經濟效益如何，相關營地未來會唔會收費。李家超回應指，呢種新嘅旅遊模式相信會成為常態，本港作為好客城市，要畀遊客感覺受歡迎，唔應該只歡迎某一類遊客。李家超又強調，遊客嘅層次有高有低，但整體對香港經濟同社會都係有好處，本港應繼續保持包容態度。

李家超又分享個人經驗：「我自己都去旅行，有時好簡單咁旅行，但有時又覺得係個購物機會，可能會花好多錢。」佢認為，本港應該妥善處理內地遊客嘅新需求同新喜好，保持樂意包容同照顧唔同旅客嘅氛圍。

《明報》記者喺邊境口岸訪問咗181名內地遊客，了解佢哋喺港嘅消費情況。調查發現，撇除住宿開支，64%受訪者人均消費超過1000元人民幣，約17%花少於500元。當中有人消費過萬，同時入住酒店；亦有背包客來港露營，三日人均消費只有500元。近九成受訪者表示主要花費喺飲食方面，而購物主要集中喺藥物、保健產品同化妝品。

86名不過夜遊客中，24人（28%）消費不足500元，其他人嘅消費就介乎500至5999元；95名過夜遊客嘅消費明顯較高，只有6人花費少於500元，有3人更消費過萬。住宿方面，近半不過夜遊客表示，來港交通方便可即日來回；約四成人則認為本港住宿太貴。

《明報》報道提及，來自汕尾嘅田先生率領30多名龍獅隊隊員參與，今次行程包食宿，有隊員表示曾經買食品，加埋交通，人均消費仍低於500元。來自福州嘅李先生同朋友未能購買5月2日嘅即日回程車票，喺高鐵站大嘆：「完啦，要睡街啦！」最後決定喺附近百誠大廈嘅麥當勞過夜，佢更表示假期期間酒店價錢翻倍，「幾日前睇緊幾百蚊，宜家就要翻五倍左右。」另外，部分遊客今次假期就選擇露營。