《香港01》報道，「五一黃金周」長假期大批內地旅客湧到香港，卻出現「旺丁不旺財」嘅奇怪現象？近日旺角一間意式西餐廳嘅負責人喺社交平台上呻爆，指因為人太多反而嚇怕咗本地消費者，導致店舖生意大受影響，怒罵：「真係多X謝晒班窮遊！」

呢位負責人更分享咗自己喺米線舖嘅經歷，指佢當晚下班後到米線店用餐時，遇上一家四口嘅內地旅客，對方喺大聲討論之後，竟然只叫咗兩碗單餸米線。當店員以廣東話提醒佢哋唔夠「最低消費」要求時，呢班內地客竟然立即發難，大聲怒吼：「不會吧！什麼低消？難怪你這店沒有人冷清清！我們不服！」

店員於是再退一步，只收取三人嘅最低消費，話佢哋再叫多一碗米線就足夠。但呢家人中嘅男子依然唔肯接受，甚至揚言：「我們不是乞討的！這樣我們不服！」店員無奈之下冇再講嘢，但呢班內地客竟然繼續「賴死唔走」，重複鬧「不服」同埋講咗好多「廢話」，令原po頂唔順，當即埋單離開，「真係好X煩又大聲，小編真係頂唔順，埋單即走」，更加表示：「刺激消費見唔到，反而見到四個人分享一串魚蛋。」

帖文引起大量網民熱烈討論，唔少網民批評呢一家四口嘅內地旅客行為極之離譜，「食個米線咋喎？店員都有讓步，計佢三個人嘅消費咋，係咪要全世界就晒佢哋？」、「其實遊客去旅行之前係應該了解下當地消費物價水平，再衡量下自己負唔負擔得起啦」。亦有網民提出建議：「其實老闆可以調整菜單，出半份同全份菜式，咁就冇咁容易引起旅客反感，始終任何遊客都未必想接受俾人鋸一頸血嘅感覺。」

另外唔少網民都認同人太多反而會令本地人唔想出街消費，「真係搞到本地人都費事出去消費」、「呢幾日都係屋企自己煮嘢食hea下算啦，等過咗呢段時間先再出街」、「係呀，見到旺角塞滿人嘅相片，我都費事出去逼埋一份，自己煮算數，仲自己整咗個蛋糕，本身仲諗住出尖沙咀行下嘅。」