美國總統特朗普有機會喺今年生日當日舉行一場前所未有嘅大型閱兵活動。根據《美聯社》掌握到嘅軍方初步文件顥示，美國陸軍正籌劃動員多達6,600名現役同後備軍人，展示陸海空多個軍種嘅力量。呢個消息一出，隨即喺政界同軍方內部引起廣泛關注。

據了解，閱兵地點初步定喺華盛頓嘅國家廣場，而日期就定喺6月14日，即係特朗普78歲生日。消息指，今次閱兵唔止有方隊同裝甲車隊，仲可能有空軍表演飛行，加埋音樂儀式，預計場面相當壯觀。

雖然國防部未正式公布詳情，但《紐約時報》引述一名國防部官員話，活動已列為白宮內部高關注嘅項目。白宮幕僚長米勒（Stephen Miller）就話：「呢場活動係展現愛國情懷嘅好機會，會令美國人更加為軍隊感到自豪。」

不過，唔少人對此表示保留。民主黨參議員墨菲（Chris Murphy）話：「美軍資源唔應該被用嚟搞一場私人政治表演。軍人係服務國家，而唔係某一個人。」

其實，特朗普早喺2017年訪法嗰陣就讚過巴黎嘅巴士底 ( Bastille Day ) 日閱兵，之後一直希望喺美國搞番場類似嘅。2018年亦提出過「勝利閱兵」，但因為預算最少都要上億而胎死腹中。

華盛頓特區市長鮑澤（Muriel Bowser）表示喺四月嘅時候，特朗普政府曾經搵市政府傾過，話想喺6月14日搞一場閱兵。活動路線計劃由維珍尼亞州阿靈頓出發——當地有五角大樓同阿靈頓國家公墓——經過波多馬克河，一直行到華盛頓市中心。鮑澤表示，佢唔肯定活動會唔會被定性為「軍事閱兵」，不過佢補充話，如果有坦克喺市區街道碌過，「應該唔會係件好事」。「如果真係出動軍用坦克，咁就應該準備埋幾百萬美元嚟補條路。」。

事實上，早喺2018年，五角大樓都好似有相同考慮。嗰時國防部長辦公室嘅一份備忘錄指出，閱兵計劃淨係會用輪式車輛，唔會有坦克，就係為咗減少對基建造成嘅損害。