美日第二輪關稅談判喺5月1日結束，喺談判翌日（2日），日本財務大臣加藤勝信登上東京電視台節目時突然「變口風」，首次鬆口話日本持有超過1萬億美元美國國債，或者可以喺同美國嘅談判中作為籌碼，明顯同佢上個月堅稱「唔會用美債做政治工具」背道而馳。

加藤補充話，持有美債主要係為咗日圓干預操作提供流動性，但係「會唔會真係用嚟施壓，係另一回事」。不過，加藤冇透露上星期會晤貝森特時有冇直接拎出「美債牌」講數。

日本首席貿易談判代表、經濟再生大臣赤澤亮正話，今輪同美方傾得「好深入」，涵蓋咗包括貿易擴展、非關稅措施同經濟安全等議題，尤其針對汽車關稅，日方強調呢個係「紅線」，堅決唔會讓步。

赤澤表示，佢喺會談中直接向美國財政部長貝森特（Scott Bessent）指出，美國針對汽車零部件徵收高額關稅，令一間日本車廠每個鐘蝕成100萬美元，情況極之嚴峻。佢話，汽車業加埋農業，都係日本經濟命脈，涉及千萬國民生計，政府絕對唔可以「就咁妥協」。

今輪談判背景係特朗普對日本徵收高達25%汽車關稅及24%其他商品關稅，儘管現時暫緩90日，但10%基礎關稅同25%汽車關稅依然生效。特朗普多次批評日本「操縱日圓」，指匯率現時徘徊喺140兌1美元左右，不公平競爭。對此，加藤斬釘截鐵否認，重申日本無操控匯率，「會同美方繼續溝通澄清」。

外界對加藤改口反應激烈。根據2024年數據，日本目前持有約1.27萬億美元美國國債，係全球最大持有國之一。一直以嚟，日本官方強調美債屬於經濟穩定工具，唔係外交武器。不過，今次表態，無疑釋出日本有意利用手上重磅資產「心理施壓」。

事實上，4月初特朗普再度拋出關稅威脅，觸發美國國債市場急跌，標普500指數亦大插10.5%。分析認為，日本今次可能係見到美國金融市場「虛火」，想借勢拉高談判籌碼。不過，真係動手減持美債，對全球金融穩定可能造成衝擊，日本自己都未必承受得起。

有評論指，日本此舉可能係策略性「警示」，並無實際操作打算，但已足以喚起美方警覺。亦有學者指出，相對中國（第二大美債持有國）而言，日本更難採取激進策略，因為日債市場高度依賴美債價格，真係拎嚟當武器，最終傷人傷己。

今輪談判並無就任何關稅項目達成實質共識，尤其係汽車產業，佔日本出口比例達28%，其中美國係最大市場。汽車關稅一日未撤，業界壓力一日都唔會減。赤澤再三強調，呢項產業關乎成千上萬工人嘅生計，政府立場「唔會鬆」。至於農產品方面，例如稻米關稅問題，更係政治地雷。日方即使願意喺農業開放作出讓步，亦要面對黨內農村勢力強烈反彈，短期內要取得共識並不容易。