加拿大2025年4月28日聯邦選舉塵埃落定，由自由黨領袖卡尼領軍奪得169席，儘管未過半數嘅172席門檻，仍然成功籌組少數政府，繼續掌握執政權。保守黨方面，由博勵治領導，取得144席，穩坐反對黨寶座。今次選舉唔淨係政壇上嘅角力，更係加拿大人對特朗普關稅威脅同主權挑戰作出嘅表態。

選前一度風向不利於自由黨，民調顯示保守黨領先超過20個百分點，博勵治拋出「讓加拿大再次偉大」口號，加上經濟改革承諾，獲得唔少選民支持。不過，就喺特朗普接連發表針對加拿大嘅貿易政治、天然資源甚至水源主權嘅挑釁言論之後，戰局峰迴路轉。卡尼把握時機，以強硬「反特朗普」立場翻盤，反守為攻，直言特朗普想「破壞加拿大」，誓言唔會讓國家變成「美國嘅第51州」。這個策略奏效，選民用選票支持自由黨，最終為佢哋帶嚟169席。

至於其他政黨，魁人政團（Bloc Québécois）攞到22席，新民主黨（NDP）今次表現失色，只剩7席，綠黨就勉強守住1席。其餘席次由獨立人士或者小型政黨分薄，但整體格局依然由自由黨同保守黨主導。

勝選之夜，卡尼高調表態，強調會以主權國家身份同美國平起平坐，拒絕任何打壓：「特朗普想攞走我哋嘅土地、資源同水源？唔好諗。我哋會以平等嘅方式應對美國，唔會再單靠呢個市場，尋求同歐盟、英國等盟友更緊密嘅合作，減低對美國嘅依賴。」

反觀博勵治喺讓步演說中語氣冷靜，話會吸收教訓、準備再戰：「改變唔會一次就成功，我哋會學習今次嘅經驗，做好準備迎接下一場選舉。」雖然敗陣，但佢同樣表明立場，喺社交媒體X上話：「特朗普，唔好干預我哋選舉。加拿大係主權國家，由加拿大人話事。」

選後嘅政治局勢可以話一啲都唔簡單。自由黨組成嘅係少數政府，喺推動法案上需要搵盟友幫手。雖然新民主黨僅餘7席，仍可能成為策略合作對象。不過新民主黨領袖辛格（Jagmeet Singh）就因為今次選輸左選區而自動辭職，引致新民主黨未來方向有變數。至於魁人政團，雖然席數唔少，但主打地區議題，要同自由黨協調並唔容易。

今次選舉亦反映出，特朗普對加拿大內政造成唔少影響。卡尼政府未來如果要兌現承諾，不單止要喺對美談判中撐住，仲要兼顧本地經濟壓力，例如樓價高企、生活成本上漲等等。而保守黨要東山再起，就要思考點樣喺主權議題之外，提出選民真係關心嘅民生方案。

值得一提嘅係，無論支持邊個政黨，今次選舉突顯出一個共識，就係加拿大人唔想被外國主導命運。選民明確向特朗普釋出一個重要訊號：「加拿大係一個應受尊重、擁有完整主權嘅國家。」