民主派「35+ 初選案」中，四名被裁定串謀顛覆國家政權罪成嘅被告：毛孟靜、譚文豪、郭家麒、范國威於昨日刑滿出獄，成為案件中首批服刑完畢並重獲自由嘅人士。四人於2021年2月底被捕，還押至今逾四年，最終被判囚4年2個月，刑期相對較輕，對比戴耀廷被判10年明顯不同。

大約凌晨5點半，囚禁喺石壁監獄嘅范國威，由兩輛七人私家車接走，車窗全部落上窗簾遮擋視線，警方亦一度拉起橙帶封鎖道路。至車隊駛離約10分鐘後先解除封鎖。接載范國威嘅私家車喺早上6點42分抵達將軍澳住所。佢落車時向傳媒講：「多謝香港人同埋傳媒關心，我好掛住我屋企人，而家想同親戚、家人團聚。」

至於毛孟靜，就喺清晨5點45分從羅湖懲教所獲釋，隨即返抵淺水灣住所。佢丈夫早上7點左右喺門外接受傳媒訪問，表示毛孟靜正休息，精神狀態都好好，並多謝外界長期關心與支持。他表示，兩人等待呢一刻等咗超過四年，能夠重聚意義重大。從門外望入，客廳掛起一條「Welcome Home Mum」嘅橫額，非常感人。

當被問到太太將來會唔會回復公開活動，佢話：「依家講未來計劃都言之尚早，會喺香港留一陣先，再睇下情況，可能七月會去英國探望孫仔。」

另外，譚文豪同郭家麒就一直被囚喺赤柱監獄。昨日凌晨約4點半有私家車駛入監獄，至近6點，有五輛七人車駛離，全部車窗都拉上窗簾，據了解，兩人就喺當中其中車輛內離開監獄。現場凌晨1點已經有傳媒守候，警方亦喺凌晨4點起拉起封鎖線以維持秩序。

四人因參與2020年民主派初選，被控策劃「35+」計劃以奪取立法會過半席位、並透過否決預算案迫使政府讓步，被裁定屬「積極參與者」。四人最終承認控罪，被判入獄4年2個月，昨日出獄，成為45名被告中第一批刑滿出獄嘅人。