據《南華早報》報導，喺香港舉行嘅一場論壇上面，中美兩地多位重量級學者罕有咁對華盛頓目前釋放出嚟嘅混亂局勢達成共識，指出特朗普發動新一輪貿易戰，加上佢顛覆性嘅外交政策，唔止令中美關係越嚟越緊張，仲有可能動搖全球秩序嘅根基。

論壇嘅參加者普遍認為，雖然兩國對美國衰落同中國角色嘅睇法好唔同。不過就一致認為，特朗普嘅「美國優先」政策，加上佢飄忽嘅行為，係加深左中美敵對，同市場動盪嘅主要原因。不過，佢哋都同時強調，矛盾嘅根源唔止係特朗普一人造成，背後其實仲存在著更深層次嘅結構分歧。

美國前副國務卿甘迺迪（Kurt Campbell）喺美國商會香港分會發表主旨演講時指出，華府目前正係一個「極端不穩定時期」，缺乏一個有規律、有深度嘅政策制定流程。佢強調：「美中之間高度依賴，但雙方對呢種依賴都感到唔自在，呢個係一個現實，唔可以逃避。」

香港大學「當代中國與世界研究中心」創辦主任李成就認為，美國而家陷入嚴重分裂，受到兩黨政治、經濟不平等、種族矛盾、文化戰爭等多重壓力。他直言：「好多評論過分聚焦喺特朗普一個人身上，將所有問題都歸咎於佢，反而忽略咗背後制度性嘅崩壞，呢個係一種危險嘅簡化。」

「特朗普能夠再次當選，唔係偶然，而係反映美國社會深層問題，亦反映制度出現咗功能失調。」李成話，即使換咗新領導人，如果唔係解決根源上嘅結構問題，問題依然會繼續。佢同時指出，中國過去三十年中產階級嘅崛起，係「人類歷史上最大規模嘅財富轉移之一」，令美國社會普遍對中國感到威脅，但同冷戰時期對蘇聯嘅軍事焦慮唔同。

李成表示，北京已經為特朗普再次上台做好準備，並指過去五年，中國外交策略已逐漸由美國轉向歐洲同東南亞。他話：「中國本身當然都有問題，但我哋亦應該認真咁諗，美國到底出咗乜問題？」

史丹福大學胡佛研究所資深研究員，中國問題專家伊康諾米（Elizabeth Economy）則認為，特朗普上台以嚟嘅混亂局面，反映出美國整體對華政策已經進入競爭模式，唔止係一屆政府嘅短暫風格。

「由特朗普第一任到拜登，再可能返嚟嘅特朗普第二任，政策方向係有延續性。」佢指出，美國對中國嘅態度出現180度轉變，兩黨達成共識，視中國為「最主要嘅戰略挑戰，甚至係威脅」。

不過，佢批評特朗普嘅交易式外交忽視咗中美之間可以合作嘅領域，例如氣候變化同公共衞生，完全冇心機建立穩定嘅溝通渠道。佢話：「呢屆政府根本唔重視呢啲議題，係一個大問題。」不過，佢亦認同李成嘅觀點，指中美兩國一樣面對收入差距、種族矛盾等社會撕裂問題。

伊康諾米指出，自從習近平上台後，中國喺政治同經濟上出現咗一連串變化，亦深刻改變咗美國對中國嘅風險評估。佢引用中國著名美國問題學者王緝思嘅說法：「要明白美國政策點解轉變，就要睇清楚中國自己點樣改變咗。」

對於關稅戰未來走向，佢抱持審慎樂觀，認為可能要三年時間先可以達成較對等嘅貿易安排。李成帶出一個非常重要嘅觀點，關稅戰只係一場「戰役」，絕對唔等同整場中美交量嘅「戰爭」：「呢場戰役可能會快結束，因為雙方都唔願意承擔長期對抗所帶嚟嘅代價。」