美國總統特朗普（Donald Trump）昨日（17日）喺白宮接見來訪嘅意大利總理梅洛尼（Giorgia Meloni），喺橢圓形辦公室會前見記者時突然語出驚人，話佢對再度提高對中國嘅關稅感到「有啲猶豫」，擔心會令美中貿易僵局雪上加霜。不過佢同時又強調，北京方面已經「好多次主動聯絡我哋」，明言想討論貿易協議。

根據《彭博》報道，特朗普喺記者面前透露，據佢了解，代表中國國家主席習近平嘅高官已經釋出想重啟談判嘅訊號。至於係咪習近平本人親自聯絡？特朗普就有啲閃躲，講法含糊：「唔係佢親自，不過係差唔多啦，應該係中國高層。」佢更補一句：「如果你識得習主席，就會知，一有人出聲，佢一定知情，佢嘅掌控力好強、好嚴，而且非常聰明。」特朗普強調，佢同習近平一直有「非常好」嘅私人關係，「我相信呢份關係會延續落去。」

特朗普亦罕有承認，對再加關稅持保留態度，甚至考慮可能要減返少少，佢解釋：「你加到一個地步，啲人就唔買嘢啦，咁我可能唔會再加，甚至唔想加到咁高。可能會調低少少，因為你都想人哋繼續買嘢嘛。」

美中兩國近日貿易戰火升級，特朗普政府向中國貨品加徵總額高達145%嘅新關稅，中方即時反擊，徵收最高達125%嘅報復性關稅。雖然雙方嘴上仍然硬碰硬，但實際上兩國都未完全關死談判大門。白宮方面一再表示，要由北京先主動出招先至肯坐低傾，不過中國官方就反駁話，唔清楚美國到底想點，雙方立場明顯陷入膠着。

講到中美另一個焦點議題——TikTok，美國方面一直要求中國母公司字節跳動（ByteDance）出售喺美國嘅資產。特朗普喺記者會上透露：「其實我哋已經同TikTok達成協議，但仲要等中國批准。我哋會等呢件事搞掂再講。」

有分析認為，中方對美國新加關稅不滿，可能係導致TikTok交易拖延嘅主因。特朗普亦有同樣感覺，佢講：「我覺得對中國嚟講呢單係好交易，TikTok對中國有利，佢哋都想我哋搞掂呢單，特別係依家已經幾乎談妥，對面係全球最頂尖幾間公司。」

記者問佢，若然中國最終批准TikTok出售，會唔會將關稅納入協商內容？特朗普回應相當輕鬆：「呢個可以講吓，係幾自然嘅事，如果大家喺度談判，我諗可能五分鐘內搞掂，唔會太耐。」《I》