美英貿易談判近日進入新一輪角力，英國表明強硬立場，唔會為咗同美國恢復正常貿易關係，而犧牲同中國之間嘅經濟合作。英國媒體《iNews》星期三（16日）引述接近英國政府高層消息人士透露，倫敦方面已經明確拒絕華府嘗試透過貿易協議同關稅作為槓桿，迫使英國減少對中經濟往來。

知情人士話，英國政府認為，將「降低美國關稅」同「疏遠中國」擺喺同一張談判桌上，根本唔可接受。英方態度相當清晰：一邊係維護本國經濟利益，另一邊係唔會配合美國打壓中國嘅企圖。英方重申，會繼續同中國展開「務實合作」，唔會因為美方壓力就輕舉妄動。英國係眾多希望美方撤銷懲罰性關稅嘅國家之一。不過，一名英國政府消息人士就強調，美英談判同英中關係係兩回事，唔可以混為一談，「我哋嘅對中立場唔會由華府幫我哋決定。」

目前由工黨執政嘅英國政府，致力於對中國採取所謂「務實」方針。有意重新啟動自2018年起因香港問題而中止嘅「英中經貿聯合委員會（JETCO）」。有評論認為，呢個舉動反映出工黨政府嘗試為兩國關係重整旗鼓，重建信任。但正當英中關係出現轉機之際，英國首相施紀賢（Keir Starmer）就喺本週面臨新挑戰——政府出手接管由中資敬業集團持有嘅「英國鋼鐵公司（British Steel）」，引發外界關注倫敦對中國投資未來會否轉趨審慎。

據《華爾街日報》報道，美國方面正考慮喺同其他國家談判期間，強迫對方承諾經濟上孤立中國，以換取關稅優惠。呢啲施壓策略亦喺特朗普領導下愈趨明顯。特朗普早前公開放話，話自己會迫使各國「喺美中之間作出選擇」，進一步加強冷戰式貿易對抗格局。不過，英國嘅外交選擇唔止受到美國壓力困擾。有分析指出，英國首相施紀賢可能更擔心中國問題對本國工業政策帶嚟嘅掣肘，甚至比歐盟貿易議題更加棘手。

前美國國際貿易部官員Renison接受訪問時指，喺特朗普領導下，美方逼盟友疏遠中國嘅節奏加快，英國將會喺此次鋼鐵收購風波後進一步檢視中國喺敏感產業嘅投資。不過佢亦指出，英國要徹底切斷同中國嘅經貿聯繫，實際上「幾乎唔可能」。Renison仲提到，即使中美之間存在巨大分歧，但雙方仍有合作空間，包括打擊傾銷、規避關稅、出口管制等領域。佢話：「雖然而家好多人認為英國應該喺美國同中國之間揀一邊站，但點樣同中國保持合作，其實對倫敦嚟講可能更困難。」

《金融時報》報道，英國鋼鐵業而家已經變成施紀賢政府一大戰略重心。政府計劃注資高達25億英鎊支援該行業，應對因應國際鋼市動盪同美國25%鋼鋁關稅帶嚟嘅挑戰。據報倫敦方面正加快制定一套「英國工業戰略」，希望穩定本地製造業、避免關鍵產業過度依賴外國資本。面對中美對抗格局升溫，施紀賢政府勢必喺保護本地產業、維持對中經濟合作之間，繼續行鋼線。《I》