中國國家主席習近平今個星期飛抵吉隆坡，展開對馬來西亞嘅國事訪問。昨日（16日）習近平同馬來西亞首相安華會面，強調中國希望同東協國家聯手對抗「脫鉤斷鏈」、「小院高牆」同埋「濫徵關稅」等行徑，劍指美國意味相當明顯。今日（17日）官媒《新華社》隨即高調發布中馬聯合聲明，幾乎通篇都係政治口號。

聲明標題長達數十字，全名為《中華人民共和國和馬來西亞關於構建高水平戰略性中馬命運共同體的聯合聲明》。文件中形容中馬兩國係「世代友好親密鄰居」、「真誠發展夥伴」、「情同手足知己」——措辭相當肉麻，官方更指兩國合作有助推動「全球南方」嘅團結同進步。

聲明一共有56點，涵蓋貿易、外交、安全、文化等層面。其中針對國際貿易局勢，雙方共同表態，要推動「普惠包容型全球化」，支持貿易投資自由化便利化，明言反對「任意徵收關稅」同「違反世貿（WTO）規則嘅單邊貿易限制措施」。

聲明話要維護一個「以WTO為核心、開放公平、包容透明」嘅多邊貿易體制，明顯係針對美國同部分西方國家近期針對中國嘅出口限制行為。馬來西亞方面亦表明支持中國申請加入《全面與進步跨太平洋夥伴關係協定》（CPTPP），重申只要經濟體符合「奧克蘭三原則」，就應該獲得加入機會。

同一時間，北京喺聲明入面再一次對台灣「抽水」，明確講到「雙方堅定支持彼此維護國家主權、安全同領土完整」，馬來西亞政府再次重申1974年雙方建交嘅聯合公報精神，強調「一個中國政策」立場，聲明中列明「承認中華人民共和國政府是代表全中國唯一合法政府，台灣是中國領土不可分割一部分」，同時表態唔支持任何形式嘅「台獨主張」，完全配合北京既定宣傳路線。

習近平此行唔只係講口號，實際上雙方政府亦簽署多份涵蓋人工智能、數碼經濟、服務貿易、鐵路基建、農產品、文化旅遊同媒體交流等合作協議，試圖將中國—馬來西亞關係進一步「制度化」同「多層次化」，形成中國口中嘅「命運共同體」。

聲明又觸及中東問題，兩國共同呼籲相關各方落實加沙停火協議，推動永久性停火，並指明加沙係巴勒斯坦人嘅加沙，係巴勒斯坦不可分割一部分。中馬雙方強調「巴人治巴」係戰後加沙治理嘅必要原則，反對任何形式嘅強制遷移，同時支持依據「兩國方案」建立獨立嘅巴勒斯坦國，並支持巴勒斯坦成為聯合國正式會員。《I》