《彭博》引述消息人士報道，美國總統特朗普準備喺新一輪關稅談判入面加大力度，向世界各國施壓，要求佢哋限制同中國嘅貿易往來，削弱中國製造業嘅實力。特朗普嘅高級經濟顧問團隊而家正商討緊，可能要求與中國經貿關係密切嘅國家，向中國進口嘅貨品加徵「二級關稅」（Secondary Tariff），同時亦希望貿易夥伴唔再吸納中國嘅過剩產能產品。

消息指，墨西哥官員已經預期，美國將會要求墨西哥大幅提高對中國入口嘅電動車關稅。早前特朗普被記者問及會唔會迫使拉丁美洲國家喺中國嘅「一帶一路」計劃同美國投資之間作出選擇時，特朗普直接表示：「可能佢哋應該要咁做。」

《彭博》認為，呢次特朗普團隊嘅策略，其實就係試圖利用長期嘅經濟盟友，進一步圍堵中國，迫使北京政府改變經濟政策。但究竟呢招有效定無效，依家仍然係未知數，因為部分外國官員喺同美方進行咗初步接觸後，已經對最終能否達成共識表示懷疑。

而家中美關稅戰嘅烈火越燒越猛，即使特朗普已經暫緩咗對其他國家嘅高關稅措施，但仍然緊咬中國唔放，直接將中國商品嘅關稅提高到245%。熟悉中國政府想法嘅人士透露，中國喺考慮同美國展開新一輪貿易談判之前，希望特朗普政府先有幾項具體嘅善意行動，包括停止喺公開場合發表貶低中國嘅言論、認真解決中國對美國制裁同台灣問題嘅疑慮，另外，中方亦希望特朗普任命一個雙方都信任嘅談判代表。

彭博指出，特朗普政府嘅圍堵中國策略想要成功，必須得到歐洲同亞洲各國嘅支持。不過，就係喺呢個關鍵時刻，特朗普選擇不分敵友一齊加高關稅，導致部分國家開始懷疑美國係咪真係一個值得信賴嘅盟友。

「二級關稅」其實源自於美國「二級制裁」（Secondary Sanctions）嘅概念。當美國對某國家、實體或個人實施制裁，最直接受約束嘅通常係美國嘅企業、個人同實體，呢種稱為「初級制裁」，簡單而直接。一般國家嘅制裁亦通常只會停留喺呢個階段，最多管到自己國家內部嘅人同企業。

但美國嘅「二級制裁」就唔係咁簡單，連同制裁對象有往來嘅外國企業、外國實體或者外國人都會被牽涉在內。舉個例，美國制裁中國華為、實施晶片禁令嘅時候，唔止係美國公司高通唔可以再供貨畀華為，就連台灣嘅台積電都唔可以再幫華為生產晶片，否則就要面對美國嘅制裁行動。《I》