香港大學深圳醫院近日再度捲入惡性醫療風波。今年一月，中國內地一名女子實名舉報指，該院喺未發現任何癌症病變情況下，竟一次過割除佢母親五個正常器官，最終導致佢母親死亡。事件沉寂幾個月後，近日網上再度流傳一段片段，一名男子喺港大深圳醫院大堂激動怒吼，指控醫院將佢老婆五個正常器官摘除，更喺手術中用藥過量令老婆變成植物人，最離譜嘅係簽文件時偷偷加埋器官捐贈選項。

據新唐人電視報道，中國媒體人趙蘭健亦有發布相關影片，披露港大深圳醫院涉及醫療造假，醫生同醫院聯手捏造病情，聲稱病人患癌，誘騙家屬簽字，然後摘取器官轉售圖利。趙蘭健更形容，呢根本就係一條有組織嘅「器官產業鏈」。

實名舉報人張女士表示，佢母親張玉華喺2018年因肚痛入院，被安排接受檢查同手術。主刀醫生紀任喺手術期間明明冇發現腫瘤，卻依然將佢母親全部胰臟、膽囊、脾臟、十二指腸同部分胃共五個器官一併切除。張女士講，母親原本身體好好，卻因醫療過程死亡，佢喺2021年就向公安機關報案，但案件至今無下文，涉事醫生紀任至今仲照常行醫，毫無懲處。

佢喺影片中激動表示，自己三年嚟不斷投訴無果，感受到無力同憤怒。佢痛批中共政權默許呢種行徑，肆無忌憚咁虐殺病人生命，根本就係踐踏人倫同法律。大量網民留言支持張女士，有人批評當局視人命如草芥，只為器官買賣圖利，更直言呢係一個無法無天嘅魔鬼體制。

對於嚴重指控，港大深圳醫院曾作出書面回應。院方指，2018年8月8日，張玉華因「膽總管擴張查因、膽囊結石伴慢性膽囊炎」入院接受診治。手術前，醫學影像顯示胰臟萎縮、胰管擴張，而腫瘤標誌物亦異常升高。其後，病人喺外院接受PET-CT檢查，報告顯示胰頭區域有1.9X1.3X0.9cm結節性高代謝病灶，醫療團隊根據增強掃描結果評估為惡性腫瘤可能性極高。

入院後，綜合判斷診斷為胰臟癌或胰管內乳頭狀黏液瘤（IPMN），屬高風險癌前病變。手術前病人同家屬已簽署知情同意書，醫院遂進行全胰切除術。術後病理結果為導管內乳頭狀黏液性腫瘤伴中度非典型性改變，臨床上屬於癌前病變，醫院指手術符合醫療指引。

病人出院後三個月，因唔明原因出現嚴重肝衰竭再度入院，最終不治。港大深圳醫院稱對病人離世深感痛惜，並指已進行全面調查同內部檢討，亦按法院判決結果向家屬作出全額賠償。對於家屬其後喺社交平台發放醫院強摘器官嘅講法，院方認為屬失實言論，並保留依法追究權利。

不過，事件冇因此平息。近日網民Huang Otto喺Facebook發布影片，再次將事件推上輿論高峰。影片中一名男子情緒激動，企喺港大深圳醫院大堂怒斥院方，指佢老婆喺醫院做手術時被用超量藥，搞到變植物人，仲話文件簽名時偷加器官捐贈，最終將佢老婆五個健康器官割晒。《I》