美國總統特朗普政府喺美國東岸時間4月9日凌晨宣布，將對中國進口貨品徵收最高104%嘅關稅。中國即刻回應話「奉陪到底」，特朗普隨即再加碼，決定對中國商品嘅關稅調高至125%。面對美國步步進逼，中國希望同澳洲合作聯手對抗美國，不過澳洲副總理兼國防部長馬爾斯（Richard Marles）就即刻潑冷水回應指，澳洲唔會靠攏中國，而係會透過推動貿易多元化，減少對中國嘅依賴，從而維護自己嘅國家利益。

中國駐澳洲大使肖千周四（4月10日）特別喺墨爾本嘅《時代報》（The Age）同埋雪梨嘅《雪梨晨鋒報》（The Sydney Morning Herald）撰文，呼籲澳洲政府「同中國攜手合作」，共同反制美國嘅貿易霸權行為。

肖千喺文章入面強調：「想阻止美國割全世界韭菜，霸凌其他國家嘅唯一方法，就係加強團結合作，一齊抵制美國。」佢又表示，喺現時呢個新局面下，中國願意同澳洲甚至其他國際社會一齊合作，聯手應對全球經濟貿易變局。

不過馬爾斯嘅回應就好清晰明確，表示澳洲唔會同中國行埋一齊：「我哋唔會拖住中國隻手。」佢重申，澳洲嘅首要目標係追求自己嘅國家利益，會集中同印尼、印度、英國、阿聯酋等國家加強貿易聯繫。馬爾斯話：「我哋梗係唔想見到美國同中國打貿易戰，但我哋所做嘅一切都係為咗澳洲利益，而唔係企喺中國一邊。」

澳洲總理艾班尼斯（Anthony Albanese）對中國要求嘅「攜手合作」表現得較為低調，語氣溫和咁表示：「澳洲會繼續為自己發聲。我哋同中國嘅貿易關係當然非常重要，貿易喺澳洲製造咗四分之一嘅就業機會，而中國係我哋最大嘅貿易夥伴，規模遠遠大過其他國家。」艾班尼斯仲指出，美國同中國之間嘅貿易摩擦影響全球市場約20%，剩低嘅80%同美國無直接關係，澳洲反而應該積極把握呢啲機會，開拓更加多嘅市場。

其實中國同澳洲本身都係亞太經合組織（APEC）同二十國集團（G20）嘅重要成員國，雙方經濟聯繫向來非常緊密，中國係澳洲最大貿易夥伴，澳洲亦係中國第八大貿易夥伴。

2017年之前，中澳兩國政府高層互訪頻繁，但之後澳洲因為南海爭議、新疆人權問題等議題，開始對中國產生戒心，擔心中國透過代理人同基建項目增加喺澳洲同大洋洲嘅影響力，隨即推出多項法律同措施抵制中國，甚至喺2020年提出要求就新冠肺炎疫情源頭進行獨立國際調查，引起中國極度不滿，批評澳洲「冷戰思維」，處處視中國為威脅，導致兩國關係跌至谷底。直至2022年澳洲工黨重新上台執政，澳中經濟關係先開始有啲回暖跡象，不過今次面對中美貿易戰再度升級，澳洲清楚表態，唔會輕易同中國企埋同一陣線。《I》