美國對中國商品加徵104%關稅之後，中國喺4月9日宣布，由星期四（10日）起，向美國貨品徵收84%關稅，令美國總統特朗普即刻宣布將中國貨品嘅關稅升至125%，同時向其他部分國家暫停加徵新關稅90日。美國財長貝森特（Scott Bessent）解釋話，除咗中國之外，其他國家喺談判期間，關稅都會回復返10%嘅基準稅率，更狠批中國報復係「輸家嘅做法」，甚至唔排除踢中國企業出美國交易所。

特朗普喺社交媒體發文表示：「由於中國一直都唔尊重世界市場，我而家即時決定，將美國向中國收取嘅關稅提高至125%。希望中國好快會明白，過去嗰種靠剝削美國同其他國家嘅日子，已經無辦法再繼續落去、亦係絕對唔可以接受嘅做法。另外，有超過75個國家主動聯絡美國商務部、財政部同貿易代表辦公室，希望透過談判解決貿易壁壘、關稅、貨幣操控及非貨幣性關稅等問題，並且冇跟隨中國報復美國，因此，我決定畀佢哋暫停新關稅90日，並即刻降低至互惠嘅10%關稅水平。多謝大家關注呢件事！」

當記者問到點解會突然轉軚，推翻之前堅持嘅關稅政策？特朗普坦言，係因為外界嘅反應「開始令人有啲驚」。佢話：「我覺得大家都似乎有啲慌亂，甚至有啲過度緊張，開始失去咗理性。」特朗普表示，自己做出呢個決定之前，「呢幾日一直不停喺度諗」，最後喺昨日一早先至確定晒所有細節。最後，特朗普特別強調，今次嘅暫停措施「完全係發自內心嘅決定」。

財長貝森特接受美國《霍士財經新聞網》（Fox Business）訪問時，直接批評：「中國經濟係近代歷史上最唔平衡嘅，佢哋今次揀用報復性關稅，根本係冇辦法嘅失敗者行為。」佢仲透露，美國而家正同其他盟國商量，試圖聯手重新調整對華貿易戰略，強調美國嘅目標係重振國內嘅製造業，而中國就應該轉型成一個靠內需推動嘅經濟體。

貝森特更指特朗普事前早已部署好陷阱，而中國輕易中計，「呢個係總統戰略部署嘅結果⋯⋯甚至可以話，係佢誘導中國行入咗呢個圈套。中國嘅反擊只係向全世界證明，佢哋先係壞人。我哋願意同其他冇參與報復嘅盟友同貿易夥伴合作。」佢話：「其實呢個訊息好簡單：唔好報復，事情就會變好。」佢更直指中國今次係徹底犯咗個大錯。

英國《金融時報》認為，特朗普今次嘅讓步（至少係部分讓步）顯示，即使係佢最引以為豪、最具標誌性嘅貿易政策，一旦引起投資者、國會議員，甚至背後支持佢嘅金主強烈不滿，佢依然願意選擇退一步，並引述一位熟悉內情嘅白宮官員透露：「特朗普能夠忍受華爾街短期受到打擊，但絕唔希望整個金融體系崩盤。」《I》