2019年7.21元朗站白衣人襲擊事件再有新發展，其中一名涉案被告王志榮，之前經過審訊後裁定暴動及蓄意傷人罪名唔成立，不過律政司對裁決提出上訴，上訴庭最終裁定律政司上訴得直，要求原審法官葉佐文重新考慮案件。葉官早前重新審理後裁定王志榮暴動及蓄意傷人罪成，案件押後至今日（8日）喺區域法院判刑。

葉官判刑時引用辯方之前嘅求情內容話，王志榮只係「郁咗幾吓手」，但葉官指出，王志榮作為當晚襲擊事件白衣人群組嘅一份子，喺元朗站無差別地向他人進行威嚇同挑釁行為，佢嘅每一個動作都同其他襲擊者緊密相連，罪責極為嚴重。葉官認為王志榮喺案件中嘅角色與同案嘅林觀良及林啟明無明顯差異，最終裁定王志榮暴動及蓄意傷人罪成，判囚7年，達到區域法院判刑嘅上限。

涉案嘅王志榮現年60歲，職業為運輸工人，之前同鄧懷琛、吳偉南等人一同受審，最初審訊時被裁定暴動及蓄意傷人罪唔成立。不過律政司對呢個裁決唔服氣，提出上訴，案件去年8月上訴庭裁定律政司得直，要求原審法官重新審理。

案情顯示，王志榮喺2019年7月21日晚上約10點40分之後，喺元朗站非付費區內參與叫罵、挑釁、投擲物品同親自襲擊一名穿黑衣、戴灰色頭盔嘅男子，之後更衝入付費區月台，舉起藤條向列車內嘅乘客指罵同拍手。影片證據顯示，涉案男子當時身穿印有「中國製造」及「MADE IN CHINA」紅色字樣嘅白色T恤、啡色短褲，並且穿著一對綁有黃色鞋帶嘅黑色波鞋，絕大部分時間戴住綠色口罩。

原審法官葉佐文雖然確認警方喺王志榮屋企檢獲嘅波鞋，與影片中涉案男子嘅鞋係同一款式且非常獨特，但當時因為涉案男子戴口罩遮蓋大部分面容，無法確認身份，最終裁定罪名不成立。

不過葉官喺上星期嘅重新裁決中指出，重審時搵到涉案男子曾經除低口罩嘅片段，可以更完整咁觀察頭部輪廓，從而作出更準確嘅判斷，認為自己之前未考慮環境證據嘅累積效應，裁定影片中嘅涉案男子就係王志榮本人，因此裁定佢暴動及蓄意傷人罪成。

至今共有14名白衣人被控暴動及傷人等罪名，所有案件現已審結，其中13人罪成判囚，包括黃英傑、林觀良、林啟明、鄧懷琛、吳偉南、鄧英斌、程偉明、鄧嘉民、吳偉德、王浩昇、鄧兆雄、鄭文傑及王志榮。當中鄧懷琛同王志榮均被判囚7年，屬區域法院判刑嘅上限。

鄧懷琛、吳偉南、鄧英斌及蔡立基曾提出定罪及刑罰上訴，最終除咗蔡立基成功撤銷罪名之外，其餘三人嘅上訴均被駁回，維持原判。《I》