美國總統特朗普（Donald Trump）喺上星期宣布全面徵收進口關稅，引發全球經濟震盪，環球股市接連重挫連跌兩日，全球經貿前景充滿不確定性。就係外界預測美國政府會出面安撫市場之際，美國官員卻反其道而行。白宮國家經濟委員會主任哈塞特（Kevin Hassett）喺接受《ABC新聞》訪問時表示，關稅政策嘅目標係糾正貿易失衡，並非用嚟迫使聯儲局減息嘅策略，並為美國工人謀福利。

哈塞特透露，已有超過50個國家主動聯絡白宮，表示希望展開貿易談判。 佢指出：「呢啲國家雖然憤怒並進行報復，但同時亦願意坐低傾…因為佢哋明白自己承擔咗大部分關稅成本。」佢強調，關稅可能會對美國消費者物價帶來一定影響，但佢認為唔會成為沉重負擔。

佢解釋，美國長期貿易赤字，係因為其他國家以缺乏彈性嘅供應方式向美國傾銷商品，例如中國透過呢種方式喺國內創造大量就業機會。 因此，特朗普嘅關稅政策旨在糾正呢啲現象，為美國工人謀福利。

美國財政部長貝森特（Scott Bessent）喺接受《NBC新聞》訪問時表示，冇理由預期經濟會衰退。 佢指出，關稅引發嘅股市反應只係「短期」現象，並強調美國就業市場依然強勁，3月份新增就業數據理想，顯示經濟基本面穩健。

農業部長羅林斯（Brooke Rollins）喺接受《CNN》訪問時表示，特朗普嘅關稅政策係「美國新經濟計劃」嘅一部分。 佢透露，已有超過50個國家主動聯絡白宮，希望展開貿易談判，顯示關稅政策已經產生效果。 不過，當被問及呢啲談判是否意味關稅可能會被取消時，羅林斯未有正面回應，只表示「仲有好多事情需要確定」。

特朗普同日回應關稅措施稱，歐亞國家都「十分渴望達成交易」，又話自己並唔樂見股市下跌，但有時必須食藥才能解決問題，形容關稅措施就係藥。特朗普並稱，美國同中國嘅貿易逆差超過1萬億美元，指除非中國解決貿易逆差問題，否則唔會同中國達成任何協議

雖然特朗普政府極力解話，但經濟學家和市場分析師就十分擔憂。摩根大通（JPMorgan）警告，關稅措施可能將美國經濟拖入衰退風險，並指今次係自1968年以來美國最大規模嘅稅收增加。國際間亦出現強烈反應。歐盟表示，正準備對美國進口商品實施總值280億美元反制措施。 此外，包括中國、加拿大等國亦宣布對美國商品加徵關稅，令全球貿易緊張局勢進一步升溫。《I》