中國安徽省3月29日深夜發生一宗致命交通意外，一架小米新推出嘅電動車「SU7」，喺德上高速公路行駛期間失控撞向護欄，瞬間起火焚燒，車上3名正準備赴考嘅女大學生疑似無法打開車門，活活被困車內燒死。事件喺內地掀起極大迴響，小米汽車安全性備受質疑，亦即時拖累小米集團股價下挫。

綜合多間內媒報道，呢宗車禍發生喺3月29日晚上約10點，當時3名女學生駕駛「SU7」，經過一段施工路段時失控，自撞高速護欄，車輛隨即起火。從曝光出嚟嘅現場相片可見，車頭撞到變形，整部車被火燒至焦黑一片，幾近完全焚毀。死者家屬表示，懷疑係因為「SU7」車輛電池撞擊後爆燃，導致整車斷電，電子車門無法解鎖，3名女學生根本逃唔出嚟，最終全部被困火場慘死。

其中一名女死者嘅父親向傳媒表示，女兒喺3月29日夜晚同兩位同學一齊從武漢出發，開車去安徽準備參加「考編」（即內地公務員考試），點知中途出咗意外。佢事後向現場交警了解情況，對方指車輛係撞到水泥樁後起火自燃，車鎖亦打唔開，「都燒了、碳化了，都認不出人了」。

小米喺4月1日發聲明，表示出事嘅「SU7」事發時正處於「NOA智能輔助駕駛」狀態，系統已偵測到前方施工路障，發出減速提示，駕駛者隨即接管車輛，但仍不幸發生碰撞。小米強調，「SU7」四個車門均配備有「緊急機械把手」，即使斷電情況下都可以手動開門逃生。小米創辦人兼董事長雷軍於4月1日晚上首次就事件發聲，喺微博發表聲明，表示：「團隊第一時間成立專項小組，3月30日趕赴了現場，3月31日配合警方調取並提交了掌握的車輛數據。」

小米其後公佈事發當晚嘅車輛數據，指「SU7」喺晚上22:27左右開啟「NOA智能輔助駕駛」，當時車速約為116公里。而根據車載系統記錄，喺撞車前16分鐘及8分鐘，系統已多次出現「輕度分心報警」同「脫手預警提示『請手握方向盤』」。到咗22:44:24，系統發出「請注意前方有障礙」提示並開始減速，1秒後「NOA被接管，進入人駕狀態」，方向盤向左轉22.06度，制動踏板開度31%；22:44:26時，方向盤向右轉1.06度，剎車力度增加至38%。最終喺22:44:26至28之間，「車輛與水泥護欄發生碰撞」。當時確認嘅時速大約係97公里。即係從駕駛接管到撞擊，成個過程只係發生喺1至3秒內。

事件喺中國社交平台引起廣泛關注，「#小米SU7高速碰撞爆燃事件細節」即日登上微博熱搜榜首。有大量網民留言質疑「SU7」缺乏有效緊急逃生機制，質疑車門設計存在致命隱患。唔少人批評小米喺事後聲明中避重就輕，無正面回應外界最關心嘅問題，包括車門到底係咪打唔開、安全氣囊有冇彈出、車輛係咪真係撞擊就自燃等等。亦有網民推測，事發時3名乘客可能已經失去意識，又或者唔識操作「緊急機械把手」，所以錯失逃生機會。

銅陵市應急管理局指出，呢宗車禍係屬於單方責任交通意外，唔屬於安全生產事故。警方亦已經確認係司機自行失控撞車，並無其他車輛涉事。小米就指，事故發生後已立即成立專項小組，趕赴現場配合警方調查同埋證據收集，亦會協助死者家屬處理後續事宜，並承諾全程公開透明處理。

其中一名死者媽媽接受訪問時質疑：「孩子當時開的是智駕，當時的情況，誰能2秒鐘反應出這個事態來？2秒鐘之內誰能立馬切換呢？」小米汽車客服則回應，指「小米SU7全系使用的是L2級智能輔助駕駛」，呢種系統屬於「輔助駕駛」，並唔係自動駕駛，駕駛人必須時刻保持警覺，隨時準備接手控制車輛。根據內地《國標》，L2級系統只係提供橫向同縱向控制輔助，司機角色依然等同傳統駕駛員。《I》